O se alii e suafa ia Talafiti Paiaaua mai i le afioaga o Matavai i Savaii, na ia tuufaatasia le tupulaga talavou o lona nuu lea e silia ma le to‘a 50 le aofai ae faagasolo ai ni aoaoga ina ia momoli i ai le tāua o le puipuiga o le siosiomaga.
O Matavai o se tasi o afioaga ua aafia i mu e tulai mai ona o le mago o le togavao i lea itu o Savaii ma o aoaoga nei na ave ai lava le tupulaga i laau ia ua aafia ona o le tau o le El Nino, le tau matutu lea ua matuā aafia ai atumotu o le Pasefika e aofia ai ma Samoa nei.
Faaalia e lenei alii e ese le tāua o le iloa ma le malamalama o tagata o soo se nuu aemaise le tupulaga i gaioiga e tatau ona fai ina ia taofi ai le sosolo o le mu i nofoaga ua mamago o togavao o le nuu.
Ua atoa nei le 10 tausaga o vaaia faafitauli o mu e sosolo i le nuu ona o le tele foi o le aafiaga o ona togavao mai lea foi vaega o suiga o le tau i lenei vaitaimi. O se fono a tupulaga talavou o le itu i Saute o le Pasefika na auai ai lenei alii e avea ma se tasi o sui o le tupulaga talavou a Samoa, ma o se tasi talavou na agai ma unai le faamamāina o togatogo i lona nuu i Faleula ae o Talafiti ua agai i auala e mafai ai ona foia le sosolo o mu i le vaitau vevela i lona foi nuu.
O le tali ua unai nei e lenei alii e ala i le fesoasoani mai o le lala o Malo Aufaatasi ua patino i atinae, o le fesoasoani tau tupe mai i le Ofisa o le Siosiomaga a le Lalolagi ma le matagaluega o Punaoa faalenatura ma le siosiomaga, o le totō lea o laau e na o Samoa lava e maua ai, ma o se suiga lea e ta‘ua e le Siosiomaga a Samoa, e mafai e laau o Samoa lava ia ona tali atu i mugala ma le tau leai o se suavai maua i le eleele ma faigata ai ona apo gofie e le afi pe a mago.
E 500 laau na totō e le tupulaga a Matavai i le faaiuga o le vaiaso ina ia tali atu ai i le leai o ni laau o totoe i le tele o togavao o Matavai ma le faamoemoe o le a faaitiitia le sosolo o le afi mai i laau fou ia e maua i le togavao ae o le a lē gata ina toe faaolaola ai le togavao i laau Samoa lava ia, ae o le a mafai ona tatali atu i suiga o le tau ua aafia ai ia laufanua o le nuu.
Sa iai foi sui o ofisa o loo lagolago i atinae o le tali atu ai i suiga o le tau ia e faatautaia e tupulaga talavou i o latou nuu taitasi.
