E leai ma se faiaoga i Samoa e lē o iloa ua faasā ona toe fasi tamaiti aoga. Ua faatulafonoina lenei tapu peitai o loo iai lava mataupu o loo laga e leoleo ma luma o le faamasinoga e faamaonia ai o loo tele lava aoga o loo faaaogā lava le sasa poo le fasi o tama ma teine aoga.
O se tali i le faigata o le tele o fanau aoga ma o se faafitauli ua manatu le pule aoga o le aoga tulagalua o Vaimea i le taulaga o Apia ua tatau ona fai i ai se faiga. Faaalia e le tamaitai pule ia Moli, ua masani lava aoga i Samoa i le tali lea, o le oo o le lima i le tama ma le teine aoga pe a lē mafai ona tali atu i le faalogogata o fanau. Faaalia e lenei tamaitai pule e lei mamao foi i le amataga o le masina lenei na oo atu ai foi ni mātua i lona ofisa e faaoo atu le lē fiafia i se faiaoga o lana aoga ua faaoolima i se tasi o le fanau aoga. O lea la na manatu ai loa le tamaitai pule e lē mafai ona tuu atu i faiaoga le tulafono ae ua masani lava i le tu ma le aga lea o le fasi o tamaiti aoga.
Na valaaulia nisi o faiaoga e mafai ona faasoa i faiaoga i Vaimea ma na iai ma le Matagaluega o Leoleo faapea le Toomaga mo ē Puapuagatia atoa ai isi o Faalapotopotoga ma ofisa ua feagai ma fanau aoga e pei o le Matagaluega o Aoga Taaloga ma Aganuu. O le latou faasoa na tāua tele i le taumafaiga lea e faataatitia ni faiga faavae e uia e faiaoga e lē o mafai lava ona taofia le sasa o tamaitai.
Faaalia e Moli, e lē faigofie le suiga o le mafaufau ae a mafai ona galulue faatasi faiaoga e fesoasoani le isi i le isi e faigofie foi ona maua le fofo o lenei faafitauli auā ua lē o toe ‘alo lava foi le tulafono e ave i le faamasinoga i latou e faia pea nei uiga.
O le aoga na saili ai auala e mafai ona faia e le faiaoga e taofi ai le sasa o le tamaititi i le aoga, e pei o le tuli i fafo ma ia aveese mai i le potu aoga mo se taimi seia oo ina fai ifo le loto tiga o le faiaoga. A fai atu lava la e faaletonu mai lava le tamaititi aoga ona ave loa lea i le pule aoga mo se faaiuga e faia i ai.
“E iai lava auala ma ou te talitonu lava e leai ma se tulai mai o nei sauaga pe afai o loo lava sauni le faiaoga e faatino lona tiute e aoao atu ma le atoatoa o lona foi mafaufau i lea aso ma lea aso,” o le saunoaga lea a le tamaitai pule aoga. Na toe faatepa foi faiaoga i le taimi o laiti i le auala foi na Faatonu ma aoaoina ai i latou e faiaoga o tausaga ua mavae. O le finauga lea e tatau lava ona sasa le tamaititi e faalogo gata, ua ta‘ua e le tamaitai pule ua matuā lē toe talia lava e le aoga tulagalua a Vaimea ma ua faaopoopo i lenei aoaoga le faatāua ina ia siaki e le pule aoga potu aoga i aso uma ma vaavaai pe iai se aogā o le aoga ua faia nei i le ola aoao atu o faiaoga o lana aoga.
