Anthony Joshua ia Sala Parker – “Aua ete popole”

E matautia le tali ale alii fusu o Anthony ina ua ia maua faamatalaga ile popole ole tuaa o Laauli Lupesoliai Joseph Parker, le tina ia Sala ile fusuaga oloo loma nei a siamupini e lua.

Na tali Joshua e faapea, “Aua ete popole. Ole a ou faafoi atu Joseph mai le fusuaga e aunoa ma se faaletonu o ia”. Fai mai a ia, e leai se mea leaga ole a oo i lana tama.

Na ta’ua e AJ e ootia lona loto ile alofa moni ole tina i lana tama, e pei o lona tina ia te ia. E faapea foi le tina o Laauli i ona lagona mo lana tama.

E tāua ia te ia lea tulaga ma le lagona faaletagata. Ole mafuaaga lea na fai ai e ia lea upu ina ia aveese ai le loto popole ole tina o Parker.

E ui ole faamoemoe ia manumalo le tasi ile isi e auala lea i tu’i malolosi, ae ua ta’utino Joshua e lē oo atu ini tulaga tugā le la fusuaga ma Parker. E ao ona manumalo se tasi oi laua e taaalo faatama tane ae iai foi le alofa ile la fusuaga.

“Ole a ou tuu Parker i ‘au tatalo ina ia toe foi ma le manuia ma lona soifua maloloina lelei i Niu Sila pe a mae’a le fusuaga,” ole faamatalaga lea a Joshua.

“Ole alofa ole tina e tāua ia te au. Ae e iai le ma galuega ma Joseph e tatau ona fai. E ma te mananao uma e fia manumalo ile taaloga, ae ta’u i lona tina e aua le popole – e alu ese Parker ma Peretania e aunoa ma ni tulaga ogaoga oni manu’aga e ono oo iai.

Na ta’ua foi e AJ lona amanaia o Parker ma lona tagata, e foliga mai o Parker e sau mai se aiga lelei.

Na ia ta’ua e lē te’i te’i faapea ni lelei ua oo ia Parker ma lana taumafai pe ana faapea e leai sona aiga lelei ma ni mātua lelei.

Ole popole ole tina e lē ose mea fou. E faapea lava ona lagona i fusuaga uma lava a Joseph. Ile savali atu o Parker i totonu ole maea, e faatalitali mai lava Sala i autafa ole maea, e sogi i lana tama a’o lei ulu i totonu ole maea.

E lei iai se fusuaga faapolofesa a Parker ua misia e lona tina. Ma ole tulimanu foi lea o faamanuiaga ua ia maua e oo mai ile taimi nei.

Ae ole isi mafuaaga ole faapopoleina ole tina ona ole ese ole fusuaga ole a feagai ai ma Parker.

Ua iloa foi ele tina o tu’i oti uma manumalo e 20 a Anthony Joshua. E lei iai se isi na sao mai ai i lima malolosi ole alii Peretania.

E oo lava ia Vladimir Klitschko na siamupini mo le 10 tausaga na tu’i oti e Joshua ile la feiloaiga.

Ae ole faaalia ai o lagona ole tina o lana masani lea i fusuaga uma. E popole ina ne’i te’i ua iai se tulaga lē ma’alofia e oo i lana tama.

Ole talileleia e Joshua o ona manatu ile fusuaga ole a faaitiitia ai lona popole. Ae e lē tuua ai ona lagona masani faaletina, poo Anthony Joshua poo ai lava e feiloai ma Parker i totonu ole maea.