Ua toe tolu vaiaso faataunuu le faamoemoe a Laauli Joseph Parker ile la fusuaga ma Andy Ruiz Jr. A‘o loma le faamoemoe oloo tapena ele Duco Event, ua fai folafolaga a Andy Ruiz e manumalo ia Parker. E mafua lea mai le taimi muamua lava na sipa ai le toalua lea. Fai mai Ruiz, e lei iloa e Parker faafetaui lana fusu.
Ole peleni a Ruiz, o lea taumafai Ruiz e fusu i totonu. Ole talionuga lea a Ruiz a ia osofai Parker i taimi uma ole fusuaga. Ole a taumafai foi e fusu i totonu, ina ia taofia ai gaioiga a Parker, aemaise le uumi o lima o Parker. Oloo iai foi le manatu maualuga o Ruiz ile vave o ona lima, lea e talitonu o ia, e sili atu le vave o ona lima nai lo se isi lava tama fusu ole paga mamafa ile taimi lenei.
Oloo lagolagoina foi ele pulega a Ruiz le vave ole tu‘i a Ruiz nai lo Joseph Parker. Na ta‘ua e Bob Arum, e tutusa le saoasaoa ole tu‘i a Ruiz ma Muhammad Ali. E na‘o Ali e tutusa le saoasaoa o ona lima ma lima o Ruiz. Ole maualuga ma le uumi o lima o Parker e lē o fefe pe popole foi iai Ruiz. Ole tala a Ruiz ua masani ile fusu i tagata uumi e pei o Parker. Ona ole puupuu o Ruiz, ole tele lava o ana paga e uumi ia te ia.
O ana fusuaga uma mai le 2014 e na‘o le tasi le tagata na puupuu ia te ia, ole alii lea o Manuela Quezada lea na lu fusu ile masina o Me, 2014. E 187cm le umi o Quezada, ae 188cm le umi o Ruiz. Ae o ana paaga uma, e maualuluga uma ia te ia. Na ta‘ua foi e Ruiz, e fiafia o ia e fusu ma tagata maualuluga. Fai mai a ia, e faigofie ona faamimigi lona tino pe‘a maualuga lana paga. Ae a maualuga atu o ia, e faigata ona faamimigi ile taimi ole fusuaga.
E lē o fefe ai la Ruiz ile uumi o lima o Parker poo le vave foi o lana fusu. Auā oloo iai lona talitonuga e vave atu ona lima ia Parker. O lana taumafaiga foi, ole a osofai ma unai Parker i taimi uma. E iai lona talitonuga a popole Parker, e faaletonu foi lana fusu. E talitonu foi Ruiz e lē iloa e Parker ona fusu solomuli, ae ole fusu solomuli ua masani lelei ai o ia.
O ā metotia a Ruiz oloo faapea foi ona tapena iai Laauli? Ole vaiaso nei na faailoa ai e Lennox Lewis lea na faia‘ina ai Toaletai David Tua ile la fusuaga mo le fusi ole Lalolagi, e ao ia Parker ona matuā faaaogā lana soa ile fusuaga ma Ruiz.
Ole talitonuga a Lewis, ose fusuaga faigata le fetauiga a Parker ma Ruiz, ona ole lelei ma le tomai o Ruiz. Peitai, a faaaogā e Parker le so‘a, e pei ona ia faaaogāina ile taimi a‘o avea o ia ma siamupini, ole a mafai e Parker ona taofiofi osofaiga aemaise ole vave ole tu‘i a Ruiz.
E talitonu Lewis, e tai tutusa lana fusu ma le fusu a Parker, ole ala foi lea ole fautuaina o Parker e matuā faaaogā le so‘a ina ia tetee ai Ruiz ma maua ai le va e faaaogā ai ona lima uumi, ma saofia ai foi ma lana tu‘i malosi.
