Ana lē sasao le afi i le ao semanu e liu efuefu le matou aiga

“E maualuga le faafetai i le Atua ona ua faasaoina le aiga mai le sasao a le afi. Ua laki o le tupu  a‘e ua malama le taeao. Talofa! semanu poo penei ua liu efuefu si o matou aiga, aemaise nai tamaiti e ona potu uma ua faatamaia.” O saunoaga ia a le susuga ia Masivao Alofoe Panoa ma le faletua ia Faafetai ina ua fesiligia i se faatalatalanoaga.

O le taeao o le Aso Sa, aso12 o Fepuari, na faateia ai le aiga ina ua sasao mai se mu i le fogafale aluga o le fale faatau i le pitonuu o Durack.

O le taimi tonu a o tapena ma sauni atu mo sauniga lotu o lea taeao, sa leai se manatu i se mea o tupu, peitai na faalogoina e Masivao Alofoe le gapapa o ni laupapa i le pito i luga ma tamoe loa se‘i asi.

A o taumafai e tatala le faitotoa o se potu, na faateia o ia i se vaaiga uigaese ma le matautia i le toe feula mai o ia i fafo e le afi na lelea mai ai ma pa‘ū i le isi tulimanu faatasi ma ona lauulu na aapo mai e le afi ma mu ai.

O potu uma o le pito i luga ua faatamaia uma ma mu, pei ona faailoa atu ana o le po semanu o se amataga o se tausaga faanoanoa pe ana mu ai ma tamaiti. Na faanatinati Masivao Alofoe ma tauvalaau e vili le fuimu, ma ua lē mautonu poo le ā le isi laasaga o le a fai.

O nisi o tuaoi na fesoasoani e fui mai ma tau tape le afi. Na taunuu fuimu ma amata latou galuega na mafua ai ona lē aafia le pito i lalo, ae ui i lea, ua tele lava ina faaleagaina le tele o meafale i aloiafi na toulu mai i le pito i lalo a o luga ia ua matuai leai se foliga i se lelei.

O le taimi nei o loo nonofo fua Masivao Alofoe ma Faafetai Panoa ma le fanau e toafā (3 tama ma le teine e toatasi) i le faletalimalo o loo totogi uma e le inisiua e faatali ai se latou fale rent e mautotogi ai mo le 6 masina e faatupe uma e le insiua.

O le isi fesoasoani ua tuuina atu foi le avanoa e piki fua ai ni latou meafale fou e faaaogāina i lo latou fale fou.

Ua faatonuina foi ina ia faamautu atu i se fale rent mo le 6 masina poo le sili atu foi, ona e manaomia le toe faaleleia ma toe lipeaina o le fale faato‘ā mafai ai ona toe sifi ane e nonofo ai.

E ui lava ina faigata le vaai atu i le tulaga na tupu peitai o le agaga faafetai o Masivao Alofoe ma Faafetai ona o loo fesoasoani malosi le la inisua i le faatupeina o vaega uma ia.

O le isi lea tulaga e tāua ai le faamaoni i le totogiina o inisiua auā e leai se faapopolevaleina ai o se isi.

E momoli foi le agaga faafetai ona o le tele o tauaiga ma nisi o tagata lautele o loo fesoasoani atu i taumafa auā ua lē toe aogā ona faaaogā se mea o i totonu o le fale.

O loo faia pea suesuega a le ausuesue poo le ā tonu le mafuaaga o le sasao o le afi; e masalomia o le ea malulu peitai e lē o mautinoa i le taimi nei.

O le taimi nei i Brisbane e ola faasoloatoa ea malulu a aiga ona o tulaga vevela o le tau.

O Masivao Alofoe e mai le alalafaga o Asau ae o Faafetai e mai Matautu-tai, Sataua, Moataa, Falefa ma Lotofaga.