Ua amata le taamilosaga netipolo a le Asosi Netipolo a Samoa. Ua tele ni suiga ua vaaia i le taamilosaga i lenei tausaga, lea ua faaofi ai ma le taamilosaga o teine i lalo o le 21 tausaga, faapea le vaaia ai o le ofi mai o au a aulotu ma ekalesia, aemaise ai au a afioaga i tua.
O le taamilosaga i le tausaga talu ai, sa na o au i le A, A Reserve, o au i le B, faapea ai au a alii. E ono au o loo tauva i le A i lenei tausaga, e ono foi au i le A Reserve, 10 au i le vaega o le B, valu au i le vaega o alii, faapea au e 8 i le vaega o tamaitai i lalo o le 21 tausaga le matutua.
O le itu mataina i le taamilosaga o lenei tausaga, o le auai mai o au a autalavou ma afioaga. E pei ona iai le au mai le autalavou EFKS Fasitoo-Uta, o le au a Teine o le I’a mai Saleimoa faapea le au a le Momoli-laau i Fogaa mai Faleula. E tasi le au a le autalavou ELKS Fasitoo-Uta o loo tauva i le vaega o le A, faapea isi a latou au o loo tauva i le vaega o le B ma le U21 ma le au a alii, ae o Teine o le I’a e tasi la latou au o loo tauva i au a tamaitai i lalo o le 21 tausaga le matutua, faapea la latou au o loo i le A Reserve.
O se vaaiga mataina taaloga muamua o le taamilosaga i le Aso Toonai talu ai ona o le pisapisao o le tapuaiga a Fasitoo-Uta, o le taaloga a le latou au o tamaitai i lalo o le 21 tausaga lea na manumalo ai i le au a le Maroons. Sa matuai mataina le taaloga i le vaega o le A Reserve a Teine o le I’a ma le au malosi a Sagata Maria. O le au lenei a Sagata Maria i le vaega o le A Reserve sa tulua ia Scopa i le tausaga talu ai ma sa iai le manatu e faigofie la latou taaloga ma le au a Teine o le I’a, peitai i le maea ai o le kuata muamua, sa tulai mai ai o le taaloga e 6 Teine o le I’a ae 5 Sagata Maria. E maea le kuata e lua e na o le 2 ai ua sili ai Sagata Maria, ma o le kuata faaiu na toe tuli atu ai e Teine o le I’a ai o Sagata Maria ma maea ai le taaloga i le 33 a Sagata Maria i le 27 a Teine o le I’a. I le vaaiga i le taaloga i lea aso, ona o le au a Teine o le I’a e fou, toe lapopoa tamaitai, ae a tamomoe e fiu le au tino laiti a Sagata Maria e tuli e le maua.
I taaloga o le Talita a Alii, na lui muamua ai e le au a alii mai Fasitoo, le au a Malisi o loo latou umia le talita. O se taaloga taufao, peitai ona o le au a Malisi ua loa le tomai i le taaloga toe manumalo ai i ai e 46 i le 21 a Fasitoo ma toe tumau ai le talita ia Malisi.
I le talita a tamaitai i le vaega o le A, sa lui ai foi e le au a Fasitoo EFKS le au a Punjas St Marys lea o loo umia le talita, e maea le kuata muamua e 17 Punjas St Marys i le 1 a Fasitoo, ma sa maitauina le toe malosi mai o le au a Fasitoo i le kuata e tolu ma tulai mai ai o le taaloga i le 56 Punjas St Marys i le 11 a Fasitoo. O ai faaiu o le taaloga ina ua maea le kuata mulimuli e 74 Punjas St Marys i le 20 a Fasitoo-Uta.
I se faatalanoaga a le tatou sui ma le faletua ia Feula Muaulu o loo avea ma Taitai o le au netipolo a le autalavou a Fasitoo-Uta, na taua ai e Feula, o le mafuaaga ua fai ai la latou au i lenei tausaga, ona ua toatele sui tamaitai o le autalavou, ae leai ni taaloga o faaaoga i ai. Na latou iloaina foi i le amataga o le au lea a Sagata Maria Punjas, o se au malosi tele ona o loo latou umia le talita. I lana ia maitau i ai i le taaloga, ua pei e meia le latou au i le amataga, peitai ina ua maea le kuata e lua, faatoa vaaia le tau toa mai o le taaalo a teine.
Na faatupeina lava e le autalavou le auai i le taamilosaga, faapea le fesoasoani a ia ma lona toalua, le faafeagaiga EFKS o Fasitoo-Uta. E oo i pasi o loo feaveai mai ai le au netipolo a alii ma tamaitai, o loo fesoasoani tele i ai le autalavou. O le faiaoga o le au netipolo a Fasitoo-Uta o le faletua ia Atele Lene.
O le vaiaso nei o le a taalo ai Fasitoo-Uta ma le isi foi au malosi o le taamilosaga le SCOPA, ae o le a lui le au a le Hyundai i le talita e taaalo ma le au a Punjas St Marys o loo umia le talita.
