I le taimi nei ua amata toleniga a Leti Leti i Las Vegas mo le sauni atu mo ana fusuaga e fitu i totonu o le sefululua masina o muamua e pei ona faataoto mai e le TKO Boxing Promotions o loo vaaia ana fusuaga i Amerika.
O Leti ua lua ana fusuaga faapolofesa sa faia i Niu Sila a o lei nofo ai nei i Las Vegas, lea na manumalo uma ai i le tu‘i oti.
Faaalia e Tuilagi Saipele Esera o le Event Polynesia mai Las Vegas, “E maualuga le laasaga lea ua oo i ai Leti ma o se avanoa e lē aumaua auā o le fola tele lenei o fusuaga a le lalolagi.
O se tasi lenei o pine o tapenaga a le kamupani a le Event Polynesia mo avanoa e lē gata i fusuaga o loo faasolo i Samoa ma Niu Sila, ae faapea i Amerika mo alo ma fanau a Samoa.”
O le alii faiaoga o Kenny Adams o ia lea ua avea ma faiaoga tumau o Leti i ana toleniga i le TKO Boxing Gym i Las Vegas.
O Kenny sa avea ma faiaoga o le aufusu a Amerika i le Olimipeka o le 1988 lea na iai Roy Jones, Riddick Bowe, Ray Mercer, Kennedy McKinney ma Michael Carbajal sa avea ma siamupini o le lalolagi ina ua fusu faapolofesa.
Faaalia e Cameron Dunkin o le pulega a Leti, “E silia i le onosefulu siamupini o le lalolagi i aupaga eseese sa koleni e Kenny mai atunuu eseese o le lalolagi e aofia ai Farani, Chile ma Pakistan. Na iai le vaitaimi e toafā siamupini o le lalolagi ia Coralles, McKenny, Phillips ma Lowell sa koleni i le taimi e tasi e Kenny. O le talitonuga e telē se lumanai o Leti i le galulue ai ma Kenny.”
O Leti sa uluai avea ma siamupini o Samoa i tulaga amateur i le aupaga o le Bantam Weight i le 2003 ma le 2004, sosoo ai ma le siamupini o le aupaga Featherweight i le 2006.
O le 2007 na avea ai ma siamupini o le Light Welterweight ma pine auro ai mo Samoa i taaloga a le Oceania i le tausaga lava lea.
O le 2007 sa malaga ai Leti ma taalo i Niu Sila ma avea ai ma siamupini o Niu Sila i tulaga tau amateur i le aupaga Welterweight seia oo i le 2009 a o lei sainia lana konekarate e fusu ai faapolofesa. Sa iai le faamoemoe o Niu Sila i le avea o Leti ma avefu‘a a Niu Sila i taaloga a le Commonwealth e faia i Initia ia Oketopa o le tausaga nei.
Peitai, ua ave le faamuamua a Leti i le avanoa mai Amerika e taalo ai faapolofesa.
O Leti e mai afioaga o Faleapuna, Salimu i Fagaloa ma Lano i Faasaleleaga, ma o loo fusu nei i le aupaga Welterweight. E faafetaia e Tuilagi le sao o mātua o Leti ia Fainuulua Emelio ma le tausi ia Itagia Leti, “O le faleaoga muamua lava o Leti o ona mātua. E lē gata i lona tama ia Fainuulua e lausilafia e le atunuu i le tele o tausaga o avea ma siamupini o Samoa ma le Pasefika i le aupaga mamafa, ae o le tiute o lona tina ia Itagia i le amio pulea.”
Faaalia e Tuilagi le tāua o le amio a le tama poo le teine taalo, e lē gata i totonu o le maea poo le malae taalo, ae o le pulea i tua pe a feagai ma tagata lautele. Fetalai Tuilagi, “O le faafitauli tele o loo lupelupea ai le taumafai a nisi o alo o Samoa ma le Pasefika ia latou konekarate i atunuu i fafo e pei ona iai le lakapi ma le liki, faapea foi i fusuaga o le amio pulea.
O le tele o taimi e lē o le leaga o le tama poo le teine taalo, ae o le tele o faaosoosoga i atunuu i fafo ma mea faafiafia ua ave i ai le faamuamua.”
Faaalia le agaga faamalo o Tuilagi ma le pulega a Event Polynesia i le taumafai a le tofa Leituala Tapusoa Fifita ma le maea a Aiga Tumua & Pule, o Luafalealo Vitale Ah Chong ma le maea a Upolu & Savaii, le tofa Vaelua Fuiavailiili Nofo ma le maea a Palauli, o le tofa Malau Johnny ma le maea a Asau faapea foi Fuivelo Mita‘i ma le maea a le Itu o Tane, i le faaolaolaina o fusuaga amateur i Samoa e ui ina o loo tagi lava i lima.
Ua silia ma tolu tausaga talu ona galulue faatasi le kamupani a le Event Polynesia ma le Samoa Amateur Boxing Association o loo peresitene ai le Tofa Togatalima Faafouina Milford, faapea le South Pacific Boxing Incorporated o loo peresitene ai le Tofa Pauli Wong Kee i le taamilosaga o le Samoa Pro Am Fights lea o loo faafailele ai tama polofesa a Samoa. Faafetaia foi e Tuilagi le tofa Asiata Leon Stanley i le taumafai o toleniga a tama faapolofesa.
Faapitoa le faafetai a Tuilagi ma le Event Polynesia i le tofa Ale Vena Ale i le galuega vavalalata mo le taumafaiga o sootaga ma pulega o fusuaga i atunuu i fafo. O le a foi le iai o tama fusu i Samoa, ae a leai ni fusuaga i atunuu i fafo, e lē maua avanoa e pei ona ua taunuu i ai Leti.
O le Teuila o fusuaga tele lata mai lea o le Samoa Pro AM Fights, lea o le a lu‘iina ai e Warren Fuiava o Faala i Palauli ma Lalomalava le fusi o le Samoa Light Heavyweight o loo umia e Togasilimai Letoa o Lalomauga ma Mulifanua.
O le po foi lea o le a puipui ai e Pele Faumui o Lalomalava ma Vaiafai o Iva le fusi o le siamupuni o Samoa i le Middlweight o le a lu‘iina e Faimasasa Tavu‘i o Satupaitea.
