Ole faamoemoe maualuga ole Iuni lakapi ale Aukilani Samoa ole faamaopoopoina, faafealofaniga, faamasani, ma le lalagaina lea ole taleni lakapi oloo i alo ma tamafanau ole atunuu o Samoa oloo nonofo i Aukilani. Ae ose avanoa lelei foi lea e maua ai se maopoopoga i totonu o afioaga ma faalapotopotoga oloo iai a latou ‘au i totonu ole Iuni ale Aukilani Samoa.
Ole vaitaimi lenei o tausaga taitasi e amata ai ona faagasolo lenei taamilosaga ile malae i Aorere i Magele, ma e foliga mai ole a amata foi ona toe tumutumu lea malae taalo ile mamalu ole atunuu ole a agai atu e tapuaia taaloga ale fanau.
Ole po ole Aso Faraile na feiloai ai faiaoga o ‘au taitasi ma le komiti faafoe ole Iuni lakapi ale Aukilani Samoa, ile tatalaina aloaia ole taamilosaga i lenei tausaga lea sa faataunuuina ile ofisa autu ole Iuni lakapi ale Aukilani Samoa i Otahuhu.
Na saunoa faafeiloai le afioga ile Peresetene ole Iuni lakapi ia Aiolupotea John Roache i faiaoga o ‘au taitasi aemaise ai ole Party ale One Pacific lea sa auai atu e faailoa nisi o ana anavatau oloo taumafai e momoli atu ile faigapalota oloo loma nei. Ile saunoaga lava ale Peresetene na ia faailoa aloaia ai ‘au e 14 a afioaga o lea ua mafai ona auai ile taamailosaga faapea ma Pool ole a taaalo ai.
Ole susuga ile failautusi ia Tuifaasisina Moe Mataafa, na ia faamaninoina ma faamanatu nisi o tulafono ole a agai i ai le taamilosaga i lenei tausaga.
Ile tausaga ua mavae e 16 ‘au sa auai, ae peitai ua lē mafai ona ausia le fuainumera sa iai ile tausaga ua tea ona ua lē mafai ona faatasi mai ‘au e lua mai Samoa le ‘au ale No’a ma le au mai Sataoa. Ole ‘au ale Apia Maroon sa latou umia le siamupini ile taamilosaga ile tausaga ua mavae ae ole tausaga nei ua taumate ele ‘au maimoa se ‘au e ono suipi ile taamilosaga ona ua lelei uma tapenaga a tama taaalo o afioaga taitasi.
Ole Pool A lea ua iai le ‘au ale Apia Maroons, Nations, Auckland Reds, Laumua o Tumua, Nofoalii, Faleula, ma Iva. Pool B lea ua iai Marist OLB, Saleimoa, Moatoga, Tama ole Lava, Laulii, Mountford, ma Moataa.
Ua faailoa ele failautusi ia Tuifaasisina Moe Mataafa, ole Aso Toonai oloo lumanai nei 26 o Aokuso ole a amatalia ai le taamilosaga ile iva vaiaso ae ole vaiaso lona sefulu 28 o Oketopa ole a taualuga ai le taamilosaga ile taitoafitu e pei ona masani ai.
Ua savalivali atu ile 22 tausaga talu ona faafoeina lenei iuni i totonu o Aukilani, ae oloo maitauina pea ele laulau ma le komiti faafoe ole taamilosaga le telē ole aogā ole iuni i alo ma fanau ole atunuu, oloo mafai ona fafagu ai le taleni a tupulaga ma fanau a nuu taitasi ae oloo mafai ai foi ona faailoa le agavaa ma le iloa o nisi o fanau ma tamalii ile faiaogaina o au taitasi.
Anavatau ale One Pacific
Na faailoa ele afioga ia Fepuleai Semi, ma nisi o tamalii ole atunuu oloo tauva ile pati ale One Pacific lo latou faamoemoe oloo iai nei mo le Aukilani Samoa pe a manuia le sailimalo a o tatou tagata ile palota oloo loma nei.
Ta’ua e faapea ole a finauina se nofoaga mautu mo polokalame ma fuafuaga faagasolo ale Iuni lakapi ale Aukilani Samoa, ae le gata i lea ole a taumafai ia lelei se tupe maua mai ile malo auā le faatinoina o galuega ale Iuni auā le agai i luma, faatasi ai ma le faamautuina oni kalapu i fafo atu o Niu Sila e agai iai tamafanau e faalautele ai le taleni auā le manuia o aiga, nuu ma ekalesia.
Ole afioga ia Tuilagi Saipele o ia sa galue muamua i totonu o faalapotopotoga ole Iuni lakapi ile nofoaga oloo iloilo ai auala ma vaega eseese e manuia ai tama taaalo, ma ole mafuaaga foi lea o lona naunau i lea tulaga ona ole manao ia manuia alo ma fanau o Samoa ma le Pasifika ile taleni ua latou maua.
Faagasologa o Taaloga o ‘Au taitasi ile vaiaso muamua 26 o Aokuso
Pool A
Apia Maroons vs Laumua o Tumua
Nations vs Nofoalii
Auckland Reds vs Faleula
Iva e Bye
Pool B
Marist OLB vs Laulii
Saleimoa vs Mountford
Moatoga vs Moataa
Tama ole Lava e Bye
Komiti Faafoe Aukilani Samoa Rugby Union
Peresetene – Aiolupotea John Roache
Sui Peresetene – Fepuleai C. Avei
Failautusi – Tuifaasisina Moe Mataafa
Teutupe – Tapui Siaosi
Isi Sui ole Komiti
Vui Leota Isaako
Fofogamua Vaa Vitale
Vaipou Savelio Fonoimoana
