Amata taamilosaga o le kirikiti Samoa

Ua amata i le vaiaso lenei le sailiga o ni au kirikiti se fā mo le sailiga o le siamupini o le Teuila i lenei tausaga. O le malae i le afioaga o Lepea lea na tatala aloaia ai lenei faamoemoe ma e valu aukilikiti o Samoa lava ia e tausinio mo avanoa ia e fā ma o le vaiaso atoa lenei e faagasolo ai ia tausinioga a o lei agai atu loa i le tauvaga o le teuila i le vaiaso o le a sau nei.

O lea ua faamautu mai e lua lava ‘au a Niu Sila, lua foi ‘au a Ausetalia ua faapea ona agai mai i Samoa mo lenei taamilosaga ma o le a fetaui ma au pito i luga e fā o le taamilosaga lea ua faatino i Samoa nei.

O aukirikiti ua faapea ona lautogia mo le tauvaga i lenei vaiaso, o le au a Liumai‘a o Fagafau, Malaeoletanu o Salesatele , Tanifa o le Vao o Tuasivi, Tosua o Aleipata, Povi Po‘a o Leauvaa, Maafolau o Vaipu‘a, Uga mai Fao o Saletele i Fagaloa ma le Posiiulai o Fuailalo i Savaii.
O le aso lava ananafi na amata ai taloga ma na manumalo ai le au kirikiti a alii a le Tanifa o le Vao a Tuasivi i ‘ai e 101 i le ‘au a Tosua o Aleipata e 66 ona ‘ai ae uma i le pe. O le ‘au a Maafolau o Vaipu‘a na malolo i le la taaloga ma le Poe Po‘a o Leauvaa 64-61 ‘ai o lea taaloga.

O le kirikiti faa-Samoa o le taimi lenei faatoa toe vaaia ai le unai ona o se tasi o taaloga ua aofai i lalo o le igoa o taaloga faa-Samoa ae o le tele o tausinioga i le atunuu i lenei vaitaimi ua ave ai le faamuamua i le kirikiti faapapalagi ona o le manatu o le Malo e aogā atu lea vaega o taaloga kirikiti ona e maua ai avanoa e taaalo ai i isi atunuu i fafo au kirikiti a Samoa auā o le kirikiti faa-Samoa ua na o atunuu lava o loo iai tagata Samoa e faatautaia ai.

E ui o lea o loo vaaia lava o loo iai nisi o afioaga o loo faagasolo pea a latou taaloga kirikiti i liki ua faia i afioaga eseese ona o le manaoga lava ia faaolaola lenei taaloga ne‘i mou atu mai i taaloga ua lauiloa ai Samoa.
Le aukirikiti a le Uga mai Fao o Saletele i Fagaloa

Nisi o tapuaiga a aukirikiti