Ua matuai faafiafiaina le mafutaga a le Malisi i Samoa i le tulaga o tapenaga mo le taamilosaga i le tausaga nei. O le faaiuga o le vaiaso na se‘i mavae atu nei na malaga ese atu ai le Au a Malisi Samoa mai Niu Sila e tauva i lenei taamilosaga.
E talitonuina o le tasi lenei o Au malosi o le a tauva ai i lenei faamoemoe. E toatolu ni alii Fiti ua filifilia i lenei Au e tauva ai i Samoa. Sa faataunuuina se taumafataga faamavae i le Au i le kalapu lakapi i Otahuhu, ma na faatumulia lea afiafi i alii ma tamaitai o loo lagolagoina le mafutaga a Malisi i Niu Sila nei.
O le taamilosaga lenei a Malisi i lenei tausaga ua atoa i ai le 27 lenei o taamilosaga talu ona faavae mai i Samoa. O loo faatasi ai i lenei tausaga ni laufali faavaomalo i le taaloga lava lenei o le Sevens i le Lalolagi, le IRB World Sevens le alii Laufali mai Fiti ia James Bolabiu, faapea foi Rasta Rasivenghe mai Aferika i Saute o loo valaauina faapitoa e laufaliina nei taaloga o le taamilosaga.
Na ta‘ua e Seumanu Douglas Ngau Chun le siitia o le tapenaga o lenei tausaga aemaise o loo vaaia pea le solosolo i luma o lenei taamilosaga i tausaga uma. Na amata mai i le 2011 e na o le 16 Au sa tauva ai, alu a‘i oo mai le 2012 agai i le 2013 ua 24 Au sa tauva ai, a o lenei tausaga ua 32 le aofai o Au ua tauva ai i lenei tausaga.
E iai le talitonuga i le isi tolu tausaga o i luma e ono ausia le 48 Au e tauva ai i lenei taamilosaga. Na faailoa mai e Seumanu e faapea e tolu Au e malaga atu i Niu Sila nei, tasi le Au mai Fiti, tasi mai Amerika Samoa, ma Au e 27 i totonu lava o Samoa.
Ua matagofie tapena, lelei le malae i Lotopa mo nei taaloga, e faafetaia ai foi e le mafutaga a Malisi i Samoa le foai tupe a le Malo o Samoa mo lea faamoemoe e amataina i le Aso Tofi, Aso Faraile ae faamae‘a i le Aso Toonai.
O le Au mai le Afioaga o Moataa na uluai siamupini i le uluai taamilosaga i le 1988, ae o Vailele o loo umia le Siamupini mai le tausaga talu ai.
O le Au mai Fiti pau lea o le Au e malaga atu i fafo ua manumalo i lea taamilosaga i le tausaga 1995, The Fiji Cavaliers. E mautinoa le tumutumu ai foi o lea nofoaga i maimoaga o ia taaloga i le faaiuga o le vaiaso nei.
