Ua amata le taamilosaga o le lakapi taitoa 7 a aoga maualuluga uma o le atunuu. O le taamilosaga ua vaaia ai le malosi o le sao o alii ma tamaitai i le faatinoga ma ua tele lava aoga mai i afioaga i tua o le atunuu ua iai a latou au mo le tausinioga o lenei tausaga.
O loo siamupini le aulakapi i lalo o le 18 tausaga a alii ma tamaitai mai le Kolisi a le Ekalesia Faapotopotoga Kerisiano Samoa i Nuuausala, ma o se faailoga o le maualuga o le fiafia o le tupulaga i le Itumalo o Aana i lenei foi taaloga.
“O le lakapi ua silafia uma lava e lo tatou atunuu e lē fuatasi i se tagata Samoa le fiafia i ai, mai i le fanau laiti e oo lava i toeaiina ma loomatutua e fiafia uma lava i le taaloga ma o matou nei i le itu o Aana e tele lava le taimi ua ave i le tuua ai o aoga e faatino ai toleniga ma le atinae o lenei taaloga,” o se faamatalaga lea a se tasi o faiaoga o le Kolisi o Nuuausala lea foi e vaaia sauniuniga o le au sinia a tamaitai a lea Kolisi mo le taamilosaga o lenei tausaga aemaise o le puipuiga o le talita o le taamilosaga lenei i le itupa o tamaitai le susuga i le Faafeagaiga o Rev. Eleasaro Esera.
O le tausaga na tea nei na saili siamupini ai le au a tamaitai a Nuuausala ma le au malosi a tamaitai o le Kolisi o Leulumoega lea na manumalo ai loa Nuuausala ae o le tausinioga o le taitoa 15 o le lakapi lava a tamaitai o loo siamupini ai le au a tamaitai a le Kolisi o Leulumoega.
O lea foi la ua taumnafai le Kolisi ia malosi ana taumafaiga i lenei tausaga i au uma e lua. E tolu au o loo tausinio i le taamilosaga lenei o le au i lalo o le 14 tausaga le matutua, o le au e i lalo o le 16 tausaga le matutua, ma le au e i lalo ifo o le 18 tausaga le matutua, ma e tausinio uma i alii ma tamaitai.
O au uma a aoga mai i Upolu nei ma le motu tele i Salafai ia e tausinio ma o le faamoemoe lava ina ia saga unai le lakapi taitoa 7 i aoga ma le agai ai i luma o lenei taaloga.
“E vaai le fanau i taamilosaga o le lakapi taitoa 7 i luga o le TV ma o loo faamalosia ai lava le naunau i lenei taaloga aemaise o le maualuga foi o le taumafai o alo o Samoa i le au a le atunuu.
O lea foi ua vaaia lava le sao atu o le au lakapi a tamaitai a Samoa i tausinioga i atunuu mamao ma o se tasi lea faamalosiau i tamaitai ina ia filifilia le lakapi o se taaloga mo le agai i luma”.
Mo le Kolisi o Nuuausala e toatasi se tama aoga ua tuua nei le atunuu mo le faalautele ai o lona tomai i le lakapi i Niu Sila. O lea alii mai i Fasitoouta na faapea ona maua le sikolasipi e aoaoina ai ma saga unai le taaloga o le lakapi ina ua mae‘a le taamilosaga na siamupini mai ai le au a le Kolisi o Nuuausala i alii i taaloga e tolu na faia ma aoga maualuluga i Aukilani i Niu Sila.
O Papatoetoe i Aukilani lea ua amata ai le sikolasipi a lea sui o le aoga a Nuuausala mo lenei tausaga ma o ituaiga avanoa nei na ta‘ua e le alii faiaoga, e tāua tele mo le agai i luma aemaise mo fanau e maua avanoa e ala i taaloga e faalautele ai le tomai ma faalelei atili ai le taleni o le lakapi. O le vasega 10 sa iai lenei alii i le kolisi i le tausaga ua tea.
O le faagasologa o le taamilosaga o le taitoa 7 o lenei tausaga ua ta‘ua ai o taaloga uma a tamaitai ua faatautaia i le malae o le Kolisi o Leifiifi ae o le taamilosaga a alii i lalo o le 14 tausaga ma au i lalo o le 16 tausaga le matutua ua faatautaia i le malae o le Kolisi a Iesu Keriso o le Au Paia o Aso e Gata Ai i Pesega ma le taamilosaga a au a tama aoga i lalo ifo o le 18 tausaga le matutua ua faatautaia lea i le malae lakapi a le Kolisi o Sagato Iosefo i Alafua.
Ua lē avanoa le Apia Park mo le taamilosaga o le taitoa 7 a aoga a le atunuu i lenei tausaga.
Na laga ni finagalo i le toe tulai mai ai o ni misa i le va o aoga ona o le toe unai foi o taamilosaga lakapi a le fanau e pei ona molimauina i le tausaga na tea nei, peitai o lea ua faamautu le malosi foi o puipuiga ua faatautaia i nei malae ina ia mautinoa le saogalemu o lenei taamilosaga.
