Amata taamilosaga lakapi liki a Aoga

O le faaiuga o le vaiaso na tea nei na faagasolo ai le uluai taamilosaga o le Lakapi Liki ua faia mo aoga a le atunuu ma o le motu tele i Salafai na faatino ai lea taamilosaga mo ‘au ua oo i le sailiga siamupini.

O le taimi muamua lenei ua faatino ai lea taamilosaga i Kolisi maualuluga i le atunuu ma o se polokalame ua faagasolo e le Lakapi Liki a Ausetalia faapea ai le Asosi o le Lakapi Liki i Samoa nei ina ia unai lenei taaloga i le atunuu.

O lea la na faagasolo taaloga i le itupa o tamaitai ma le itupa o alii ae o le vaiaso ma o le Kolisi la o Uesiliana i Savaii lea na faatautaia ai loa lea sailiga siamupini. O le taaloga i le sailiga o le siamupini mo i latou e i lalo o le 18 tausaga na fetaui ai le siamupini a Upolu le kolisi o Nuuausala ma le ‘au a le kolisi na talimalo o Uesiliana. E tailua sikoa na maua e ‘au uma e lua peitai o le aaina o le polo mo sikoa nei na filifili ai lava le manumalo ina ua sao uma aa i le pou a Nuuausala ma maua ai le faaiuga o ‘ai e 12 Nuuausala i le 8 a le ‘au a Uesiliana. O le alii o Wesley Patu o le kolisi a Nuuausala na maua le faailoga o le tama taalo o lea tauvaga.

O le isi sailiga siamupini e mo le ‘au a alii i lalo o le 16 tausaga le matutua ma na faapea ona manumalo ai le ‘au a le Kolisi a Pesega ina ua fetaui ma le ‘au a Uesiliana foi i le matutua lea ma o ai o lea taaloga e 20 Pesega i le 12 a Uesiliana ma na faafetaia e le alii pule o le Kolisi a le Ekalesia a Iesu Keriso o le Au Paia o Aso e Gata Ai le Kolisi a Uesiliana i se taligamalo maoae mo aoga uma na tauva, ma na foai atu e le kolisi a Pesega le latou togiga a le aulakapi mo le kolisi mai i le motu tele i Salafai.

E tolu ‘au na tausinio i le itupa o tamaitai ma e lua ‘au a tamaitai mai i le Kolisi o Pesega ae o isi ‘au e mai i le Kolisi o Nuuausala ma le Kolisi o Uesiliana.

O le faafetai a le sui o le Asosi o le Lakapi Liki a Samoa, o Tagaloa Faafouina Su‘a ona o le tali mai o nei aoga aemaise foi le motu tele i Salafai i lenei taamilosaga, ua amata ma ua fili mai ai foi ma se ‘au e fetaui ma se aufili mai i Ausetalia e malaga mai i Samoa i le masina fou.

Se vaaiga i taaloga a fanau aoga mo le lakapi liki