Sa iai le fuafuaga o alii ma tamaitai faamasino o le Faamasinoga o Fanua ma Suafa e amata ai se suesuega o tomai i tulafono mo le faatautaia o suesuega a lea faamasinoga ia tatou tu ma aganuu ma suafa matai aemaise o fanua faaleaganuu.
Na faailoa e le Tapaau o le Iunivesite Aoao o Samoa na talosaga atu le ofisa o faamasinoga mo le faia ose a’oa’oga e maua ai ni tusipasi o faamasino o le faamasinoga o fanua ma suafa peitai na tapena le iunivesite e amata se a’oa’oga faapea ae toe faamaamulu atu le matagaluega o faamasinoga. “E oo mai i le taimi lenei matou te leiloa pe aisea ua le faaauauina ai le manaoga na aumai ia i matou,” o le finagalo lea o le Tapaau le afioga i le Polofesa Fui Dr Asofou Soo.
“O le mafuaaga lena ua a’e ai se manatu o le iunivesite ma ua pasia e le Fono Faatonu e faatino loa ae ua tatala nei mo soo se tasi o le atunuu”. Na faaalia foi e le Tapaau o le tusipasi e maua mai i le a’oa’oga pe a mae’a ma faauu e mafai ona maua ai se galuega e avea ai ma Faamasino o le Faamasinoga o Fanua ma Suafa, ae mafai foi ona maua ai se galuega i isi auaunaga e manaomia ai nisi ua iai le silafia i suesuega o tulafono tau i fanua faaleaganuu o suafa matai faapea tu ma aganuu faa-Samoa.
O se taimi muamua lea ua ave ai se mataupu faapea i le Iunivesite a le atunuu ma o le naunautaiga o le pulega o le iunivesite ia mafai ona faafailele lava e le Papaigalagala ni tomai e autu i le tagofia o ni suesuega ia tatou lava measina faasino i suafa matai ma fanua tau Samoa auā o o tatou tagata lava e tatau ona lava saunia ma tapena mo le faia o sea galuega. O le a ave ai ma nisi o mataupu e pei o le pulea o galuega ma tagata faigaluega.
O le Aso Tofi ma le Aso Faraile ua mavae na tatala ai le lesitala mo nisi e fia sueina lea tomai mo le maua o se tusipasi, ma le faamoemoe e mae’a le mataupu i le masina o Mati o le tausaga fou ona fetaui lea ma le faauuga a le Iunivesite ia Aperila o le tausaga fou lava 2019.
A lē maua le toasefulu o tagata e lesitala mo lea mataupu e le faaauauina, ae peitai ua maua ni faamatalaga faatuatuaina e toatele ua lesitala mo lea a’oa’oga. O nisi o sui ua lesitala o loo galulue o ni faatonu o le Faamasinoga o Fanua ma Suafa.
