O le aoauli ananafi na amata ai sauniuniga mo le saiilia o se aufili a Samoa i le lakapi mo le fanau e i lalo ifo o le 20 tausaga le matutua.
O le malae taalo a le Malisi Sagato Iosefo i Lotopa na faatautaia ai lea faamoemoe.
O le amataga o le vaiaso na faaalia i le pepa faalauiloa a le Iuni Lakapi a Samoa, e silia i le to‘a 50 fanau a le atunuu na aga’i atu i le nofoaga tutotonu o loo faafailele ai le taaloga o le lakapi le HPU i Tuanaimato e lesitala o latou suafa mo lea taamilosaga ma e talitonu le Iuni o le a faaopoopo pea lea numera i le vaiaso lenei.
Faaalia e le Taitai Malaga (Manager) o le au i lalo o le 20 tausaga a le atunuu le susuga Andy Ripley e tolu lava taamilosaga e saili ai nisi o le a fai ma sui o Samoa i lana aulakapi lea ma o le aso ananafi lea na amata ai ae o le aso 23 o Aperila le isi taamilosaga, ma o le aso 26 o Aperila lava o le a faia ai le faiga filifiliga mulimuli ma o le sailiga mulimuli lea ua iai le faamoemoe e iai uma lava alii taaalo mai i Samoa nei faapea atunuu mamao o loo saili avanoa i lea au a le atunuu. O le aso 29 o Aperila lea ua fa’amoemoe e fa’alauiloa ai loa le lisi o le ‘au o le a filifilia.
E to‘a 20 i latou o le a filifili mai i nei taamilosaga poo trials. Faaalia e le taitai malaga, o le taimi lenei e le o iai se fuafuaga e agai i Savaii le sailiga lenei ae o alo o le atunuu i le motu tele i Salafai e mafai ona malaga mai i Upolu ma o le a faalauiloa le aso e mafai ona taaalo pe tausinio ai nei sui o le atunuu i lenei faiga filifiliga. O Samoa i le matau atu i le faataatiaga o taaloga o le Ipu o le lalolagi o loo faapea ona pulu faatasi ai Samoa ma Uelese, Argentina faapea Sikotilani i le Pool C ae o le au a Niu Sila o loo pulu faatasi ma Aialani, Ausetalia ma Fiti ae o le Pulu A o le a tauva muamua ai le siamupini o le lalolagi i lea vaega o le tausinioga o le lakapi.
