Ua loa ma silafia e le lalolagi ituaiga taumafa e mafua ai le ma‘i suka ma le toto maualuga ae peitai o loo vaaia pea le faatupulaia ma le maualuga o le fuainumera o tagata e aofia pea i lenei gasegase e aofia ai ma o tatou tagata.
Mo tagata Samoa i Sini, Niu Sa Uelese, o le mafuaaga lena o le tuufaatasia e susuga i Fomai Samoa i Sini ia Dr Olataga Alofivae Doorbinnia ma lona toalua ia Kamal Doorbinnia se aoaoga ma le Iunivesite o Sini i Sisifo i Campbelltown e fesiligia ai taitai o tagata Samoa i Sini mo mafuaaga ua siitia ai pea tagata e aafia.
O loo taiulu i lea sailiiliga poo le Reference Group le Alii Polofesa ia David Simmons ma le tamaitai Polofesa ia Jennifer Reith lea e fuafua e feutagai ma galulue ma sui e toaluasefulu o le atunuu i fesili ma faamaumauga i soifua i aso uma o tatou tagata ia latou tausami, galuega ma gaioiga e tau foia ai le tuputupu o le gasegase.
E tusa ma le sefululua masina le umi o le polokalame o loo fuafua e uma ua mautu ma silafia lelei auala ma ni fofo e tau tineia ai aafiaga.
O le fomai Samoa afioga Seagaitumua Dr Paniani Si‘u Patu o loo aofia ai i taitai e luasefulu o Samoa i Sini nei faatasi ma le Konesula o Samoa, Peresetene o le Fono Aoao o Tagata Samoa i Sini, Taitai o Ekalesia, La‘u Samoa ma tagata Samoa o loo faigaluega i matagaluega eseese.
O le Afioga i le Konesula Fonoti Manogiamanu Etuale Ioane na saunoa amata e folasia tu ma aga masani a tatou tagata e mafua ai le aafia tele i le suka ma le toto maualuga, sosoo ai ma le Ekalesia Aso Fitu i la latou taumafa o tausisia auā le puipuia.
Na sosoo ai ma se saunoaga a le Peresetene a le Fono Aoao a Samoa i taumafaiga e unaia le mamalu o le atunuu e faatāua le vaaia o fomai ma siaki e pei ona galulue ai ma le Grace Point Church ia Ps Vili Aufai.
O le taimi muamua lenei o le a tuusa‘o atu ai loa le aotelega o lenei suesuega mo le matagaluega tele a le Soifua Maloloina auā na saunoa Prof. David Simmons e tele nisi sailiiliga faapea na faia muamua e nisi ma faamoloau atu lava e aunoa ma se taunuuga mautinoa.
Ua ia faaailia foi e lē gata o le maua ai o le ‘au o le paipa ma aotauina ai tagata Samoa i Sini nei. E taivalu vaiaso ma fono lenei komiti auā le faamaumauina o faamatalaga ma sailiga e fua i ai vaega o loo mafuli na sese ai ma faatamala o tatou tagata i meaai, ituaiga faamalositino e lē faia ma le sui o mafaufauga i auala ma amio tuai i taumafa.
