O le masina fou lea e tatau ona oo atu i ai ua mei le Kamupani a Molesi Frankies i le fogafale a lalo o le Fale fou o le NPF.
Ua aliali ane le galuega tele lenei i luga ane o le pa o loo puipui ai ma o se galuega ua ta‘ua e le sui o le Faalapotopotoga o Faaputugatupe mo le lumanai manuia o tagata lautele – le NPF, o loo ua alu lava i le tulaga o iai le fuafuaga o le fausia o lenei fale, ma o le vaega muamua la e tatau ona mae‘a ia Tesema, lea e toe tatala ai ma faitotoa o le Supamaketi tele lea ua faaigoaina o le Molesi Frankies.
Faaalia e Tagaloasa Willie Matafeo, o Molesi Frankies ua na o se tasi lea o le tele o Faleoloa faapea o le a tatala foi i ai le avanoa e faaaogā le fogafale i lalo o lea fale tele mo a latou pisinisi, ae talu ai o le nofoaga tonu ua fausia ai lenei fale tele, sa iai le Molesi Samoa i tausaga ua mavae, o lea ua ave ai lava le faamuamua i lea faleoloa mo le avanoa i lea galuega tele. O le kamupani a le Cappella Construction lea ua o latou faatautaia le galuega lenei, ma o se faleoloa lea e ta‘ua o le Mall – o se mall tele muamua lea ua fausia i Samoa.
O le fausaga muamua foi lenei ua fausia atoa ai lava se fogafale tele mo taavale e agai i ai.
O loo iai se nofoaga faapea o loo mafai ona faamautu ai taavale a tagata faigaluega i le fale o le Ofisa o Taui o Faalavelave Faafuasei le ACC lea foi e i le taulaga, peitai e laitiiti lava avanoa mo ia ituaiga auaunaga.
Ae o le fale fou o le NPF o le a mautinoa ai loa se nofoaga tele faapea mo le mamalu e asiasi atu i lea fale tele mo faatauga.
Faaalia e Tagaloasa, soo se galuega lava e tatau ona iai avanoa mo fesuiaiga, ma e ono iai ni fesuiaiga e pei o le faalautelega o nofoaga nei mo le tutū ai o taavale poo nisi foi o galuega i totonu lava o le fale, ae o le a maua uma lava ni fesuiaiga e toe faatautaia i le mae‘a ai o le vaega muamua lea o le galuega.
O Mati o le tausaga fou e tatau ona oo atu i ai ua mae‘a le vaega lona lua ma le vaega lona tolu e tatau ona mae‘a a o lei faaiuina le tausaga fou.
“Seiloga lava foi la e mae‘a le galuega atoa ona faato‘ā tuu atu loa lea o le avanoa i soo se tasi o le atunuu e iai le manaoga e totogi se avanoa e faatu ai sana faleaiga, faleoloa poo le ā lava le auaunaga e talafeagai ma mea nei o malls ona faato‘ā faia lea i le taimi lea, ma e mae‘a loa ona filifili faleoloa ma isi atina‘e e mafai ona maua i lenei nofoaga, ona faato‘ā tulai mai loa lea o le mall lea i Savalalo”.
Faaalia foi e Tagaloasa, o loo tatala le avanoa mo talosaga ae o le faaiuga faato‘ā faia lava i le mae‘a ai ona fausia atoa o le galuega.
Ona pau se isi faatuai e ono tulai mai i fuafuaga o lenei fale tele, o le tulaga lea i le tau o afā ma timuga lea ua amata nei, ae o loo talotalo lava le NPF ia mae‘a lelei lava le galuega lenei i lona taimi faataatia lea e tatau ona oo atu i le Kirisimasi o le tausaga fou ua tulai mai le Mall mo soo se faatauga a le mamalu o le atunuu.
