“O le taimi nei o loo struggle lava le tatou Malo ae ua manatu le Kapeneta e tuuina atu lea fesoasoani mo lenei taimi e toe amata ai a outou pisinisi”…Minisita
E $293,000 se vaegatupe a le Faalapotopotoga o Eleele a Samoa (Samoa Land Corporation) sa pulea ma vaaia ma le maketi i Savalalo ua amata tufa atu i le au fai fili maketi poo pisinisi laiti ua faaumatia a latou oloa i le malaia na aafia ai le maketi i Savalalo.
O lea vaegatupe o le a maua ai e le fai pisinisi le tinoitupe e tasi le afe tala ($1,000) mo i latou e to‘a 293. O le faamalamalamaga a le ofisa, afai e lua poloka ma sili atu o le aofaiga foi lea o ta‘i afe tala e maua.
Ua faafiafiaina ai le au pisinisi e tele a latou poloka sa totogi, ae o le tagata lava ia e tasi le poloka ma tasi le faleoloa sa ia lisiina e na o le tasi le afe tala e maua.
O le faanoanoaga lea oi latou sa lisiina faleoloa ona a fua i le tau o a latou oloa ma meatotino e pei o pusaaisa e fai lava si taugata ae lē fetaui ma le seleni o le a maua.
Peitai na faailoa manino e le Minisita o le Faalapotopotoga o Eleele a Samoa ma le Faalapotopotoga o Taui o Faalavelave Faafuasei o loo pulea le maketi i Savalalo ua faaleagaina ma le maketi fou i Fugalei, le afioga Lautafi Fio Selafi Purcell, o le a toe logoina le mamalu o le au faipisinisi laiti pe a iai se isi fuafuaga a le Malo mo i latou.
Na maua le avanoa o le tusitala e talatalanoa ai ma nisi o le au faipisinisi i so latou lagona e tusa o le fesoasoani. “O a‘u ia ua sili le iai nai lo lē maua o se mea, auā pe ana lē finagalo i ai le Malo semanu e sulu lava le ulu o le tagata e saili se seleni e toe tau amata ai”, o le finagalo lea o se tasi o tamalii matua mai le itumalo o le Vaimauga ona o ia o se tasi o fai poloka ile maketi.
O lana faamatalaga e lua ana poloka ma ua liu lefulefu uma i le mu. Na faamatala mai foi se tasi o tina o ia e fā ana poloka ma e lē gata ina mu uma lavalava o lana oka na aumai i Hawaii ae ua alu uma ai ma ana laau suisui e lua. E fai lava si tele o le seleni ua gau i oloa ma laau suisui ua lē toe maua mai”. I le feiloaiga a le au faipisinisi laiti ma le minisita na faailoa ai e le afioga Lautafi, o lea ua talanoa le Malo i le Matagaluega o Tupe e silasila i se isi fuafuaga e pei o le tatala o ni nonogatupe mo i latou ua aafia ae fai ni aiaiga i ni tului maualalo. “O le tasi lena laasaga o fuafuaga a le Malo mo outou”, na saunoa ai le Minisita le afioga Lautafi.
I le taimi nei ua vaaia le faatutū o ni faleie tetele i le nofoaga sa iai le maketi i Savalalo, lea o le a toe amata ai pisinisi a i latou na aafia. Peitai o le isi vaega ua maua avanoa e faagaioia ai a latou poloka i le maketi i Fugalei.
O le tulaga i le ave oi latou i le maketi i Vaitele tai, na faaalia e le Palemia susuga Tuilaepa L Sailele Malielegaoi, e ui lava o le tasi lea o avanoa lelei mo le au faipisinisi ae o le mea moni e leai se isi e fia alu i se mea e faaletonu ai le tupe maua.
E manino i le finagalo o le alii Palemia o le mafuaaga foi lea na leai ai nisi e agai i Vaitele ina ua tala i lalo le maketi i Fugalei.
