Amata le mafutaga a alo ma fanau a Tiavea i Melepone

Tupu ma tamalii, faletua ma tausi o le mafutaga a Tiavaea i Melepone
Tupu ma tamalii, faletua ma tausi o le mafutaga a Tiavaea i Melepone

O le lua vaiaso talu ai i le faaiuga o lena masina, na ofaga potopoto ai mo le uluai taimi tupu ma e’e tapaau ma tulatoa tainane faletua ma tausi ma le paia maualuga o le afioaga o Tiavea o afifio ma papaaao i le aai o Melepone.

O le afio lava lea o Tuiavii ma le Usoalii, susū Valai ma le taauso, susū le Ma’opu, alalatai le Faleulu ma upu i le Falelua, le mamalu ia Saleaumua.

O le lupe faalele lava a le afioaga le susuga i le faafeagaiga taulagi ia Rev Iopu Auvaa o le Ekalesia Metotisi na taitaia le sauniga lotu na amataina ai le mafutaga mamalu, ona faagasolo lea o le faamoemoe autu o le feiloaiga, o le fia mafuta lea ma faafeiloai tamalii uma ma aiga taitasi o le afioaga, ma faamasani ona ua toatele le paia o le afioaga ua faasuafaina aemaise o alo ma fanau na soifua i Niu Sila ma Ausetalia nei, e lei feiloai ma atonu foi e lē o silafia nisi o tauaiga o le nuu o ta’ape ma salalau i le aai tele.

E le gata foi i lea, o le agaga maualuga i le au fai tofa, o le fia a’oa’oina lea o a latou tamafanau i o latou faasinomaga aemaise o measina a lo latou afioaga ma o latou aiga, ae le gata foi i lea, o se sootaga ma le faiganuu i Samoa, pe a tapa se fesoasoani mai alo ma fanau o loo alala i nuu i fafo.

O lea ua amata ona mafana le silafia o tamalii i aiga uma aemaise o suafa e ono au iai se tuualalo mo fesoasoani i Samoa, o lea foi ua mae’a filifilia ai nisi o tamalii i lea aso o le a fai ma poutu o le mafutaga auā ni fuafuaga faaalualu ma le nofo fealofani o le afioaga i Melepone, ua tusi aao ai i le tofa ia Sola Lemalu Faatau e fai ma taitaifono, o le aao tusitusi o Yoana Tuiavii Niu, ma le teuoloa o Lina Fono Tuiavii.

Ua iai le faamoemoe o le laulau o le a tupu ma ola le mafutaga a lo latou afioaga i le galulue faatasi, aemaise foi o nisi o a latou fuafuaga faataoto o le a faia i le lumanai.