Autalavou EFKS Te Atatu

Autalavou EFKS Te Atatu

Ole iva ai nei o tausaga o faagasolo polokalame o pesepesega ole fanau mai ole pepe ole Kerisimasi ele (EFKS ) Puaseisei a Magele i Sasae. E 7 tausaga o faagasolo mo le 13 Aso ole Kerisimasi, ae ole lona lua ai lenei o tausaga talu ona faaigoaina ole 7 Aso ole Kerisimasi.

Ta’ua ele susuga ile faafeagaiga, e fua lava ile taitaiga ma le musumusuga ale Agaga ole Atua i lea tausaga ma lea tausaga mo suiga. Ole po muamua ole Aso Sa 10 Tesema na tatala aloaia ai nei pesepesega ole 7 Aso ole Kerisimasi i lenei tausaga, sa peseina ele autalavou EFKS Te Atatu. Ole susuga ile toeaina Rev Elder Lucky Slade ma le faletua ia Terri Slade, na o laua faafoeina mai le Sa ole autalavou i Te Atatu i lea afiafi.

Sa viia ele susuga ile faafegaiga ia Victor Pouesi le auala o pesega na faaaogāina ele autalavou e momoli atu ai le viiga ole Atua i lea po ma le feau ile Talalelei ole soifua mai ole pepe fou ole Kerisimasi. Na ta’ua e Victor Pouesi, “Ole itu tāua ia te au, ole faaaogā lea ele fanau talavou ole ituaiga musika oloo latou fiafia iai e momoli mai ai le feau.”

“I talaaga ole taunuu ole talalelei, sa taimua mai le ekalesia EFKS ma isi lotu tetele ile faiga o viiga, a’o saua le folauga faaleagaga, ua tele ekalesia ua o latou siitia le viiga ole Atua i pesepesega ma faiga faaonapo nei, ma ua pei ai ose teu fugalaau matagofie le felanulanu ai le Talalelei ale Atua.”

“Ole oo mai ole feau i pesepesega i lou loto faapea i latou oloo maimoaina lenei faamoemoe, ole vaega sili atu lea nai lo ole lauga ile pulelaa, ole viiga ile Atua le mea sili, nai lo ole tu ma le aga faatalitonuga.”

Ile faauigaina ole fanau mai ole pepe fou i lea afiafi i pesepesega ma feau ole po muamua o pesepesega ole 7 Aso ole Kerisimasi, e faapea upu amata, “Agelu e ua leaga tele lava tagata ile lalolagi, o manatu uma ua mafaufau ifo ai i o latou loto ua na o leaga ia i aso uma lava.

O lea tala’i atu ile lalolagi, ua fanau mai moi tatou le tama, ua foaiina mai mo i tatou le atalii, e i lona ua le malo, e igoa foi o ia ole silisili ese, ole faipule, ole Atua malosi, ole Tama ole faavavau, ole Alii ole filemu.

Ole ogatotonu ole tausaga nei, na faatoa faaulufaleina ai le malumalu fou ole eklaesia, lea e silia ile 2 miliona lona tau aofai, peitai e lē o faavaivaia ai le ekalesia e faatino se mea ua taitaia ai ele Agaga ole Atua e faataunuu i lenei tausaga. Ta’ua ele susuga ia Victor, “Ole feau mo le toatele le vaega sili ona tāua mai nei pesepesega ma tala faatino.”

“E fono lava le ekalesia auā polokalame ile lumanai, peitai e faamoemoe lava ile musumusuga ale Agaga ole Atua, pe 7 Aso ile tausaga fou pe toe foi ile 13 Aso, ae a leai e mafai foi ona 10 Aso, e fua lava ile Atua ma lona finagalo”.

Ole po ole Aso Gafua, 11 Tesema na pepeseina ele ekalesia AOG Papatoetoe, susuga ile faafeagaiga ia Keti Ualesi ma le faletua Palepa Ualesi.

Ole Aso Lua 12 Tesema, ole ekalesia Metotisi St Paul. Ole Aso Lulu 13 Tesema, ole autalavou ale Ta’imua (Taimua Youth Ministry). Aso tofi ole ekalesia Woraship Center Otahuhu susug ile faafegaiga ia Sepi Suluape ma le faletua ia Soe Suluape.

Ole Aso Faraile 15 Tesema ole ekalesia EFKS Puaseisei, le susuga ile faafegaiga ia Victor Pouesi ma le faletua ia Salome Pouesi, ae taualuga ile po ole Aso Toonai ele ekalesia mai Samoa, le EFKS Falevao le Susuga ia Richard ma le faletua ia Imoa Noaese.

Ole silasila ale faafeagaiga ia Victor ma le Ekalesia i lenei tausaga ma le lumanai i viiga ole Atua, ia tumau pea le faavae o Iesu, ae o ona faiga e fesuisuia’i, e ala i pesega ma siva e momoli ai le taulaga ile Atua.

Ole itula e 7 ile afiafi ile tuatusi 24 Wynthrop Way Magere East e faataunuuina ai le faamoemoe. Oloo faasalalauina tuusa’o foi lenei faamoemoe ile Radio Samoa 1593AM, faapea le facebook ale (Radio Samoa) mo i latou oloo fia maimoa i nei pesepesega.