Ua tele mataupu ua oo i le faamasinoga e aafia ai tapuaiga, ma ua teena ai se finagalo o alii ma faipule o nuu, e tapu ma faasa ai se tapuaiga e fou atu, ae ua faatulai ese ai ma tagata ua auai i se lotu fou.
Ua leva ona taatia i le Malo se finagalo tusitusia o le Fono a Ekalesia Soofaatasi i Samoa, ina ia faamuta le toe faaulufale i le atunuu o nisi lotu ma tapuaiga fou. I se isi faaupuga ua lava lotu ua i Samoa.
E tele mafuaaga ua faavae ai lea finagalo o le Fono a Ekalesia Soofaatasi, peitai e feteenai ma le Vaega 11 o le Faavae o le Malo ma le atunuu, o loo faasino i le saolotoga o lotu ma tapuaiga (freedom of religion).
O le agaga lea o le folasaga a loia a le Malo o loo faufautua nei i le itu tau tulafono i le galuega a le Komisi Suesue. Na manino le folasaga a alii loia o Arthur Lesa ma Peter Bendall i le mausali o le saolotoga o lotu ma tapuaiga i lalo o le faavae, aemaise o le aia ma le saolotoga o tagata Samoa e filifili ai i lana tapuaiga ma le lotu e fia auai.
O le saolotoga foi lea e filifili ai pe fia auai i se lotu pe leai. E lima ni mataupu na fofogaina i le faamasinoga ma faia i ai ni faaiuga na faatepa i ai e loia le mamalu o sui o le komisi, e fesoasoani ia latou iloiloga ma taialaina ai a latou faaiuga.
O le tausaga e 1979 na faia ai se faaiuga a alii ma faipule o Matautu Falelatai e faatea ma le nuu se tasi o le afioaga ona ua na le usitaia le tulafono o le lē lotu i le Aso Sa.
Na ave e lea tagata le faaiuga a le nuu i le faamasinoga ma aumai ai le faaiuga, ua aafia le aia tatau a le tagata soifua o lē na faia i ai le togisala, e filifili saoloto ai pe auai i le lotu pe leai.
O se isi mataupu na folasia e alii loia, o le faateaina e alii ma faipule o Falealupo o ni tagata o le nuu na auai i se mafutaga faale-Tusi Paia sa faafoe i totonu o le nuu.
E lei aiaina e le nuu le mafutaga i le amataga, ae ina ua sosoo le aoga Tusi Paia ma le faia o sauniga lotu i Aso Sa, na liliu ai loa alii ma faipule ma faia le faaiuga e taofia le mafutaga ma tulai ese i latou sa auai ma le nuu.
Na oo le mataupu i le faamasinoga maualuga ma aumai ai le faaiuga, na teena ai le faaiuga a alii ma faipule o Falealupo, ona ua aafia aia tatau saoloto o tagata e tapuai ai ma filifili ai i le tapuaiga e fia auai e pei ona tamau i le Vaega 11 o le Faavae.
O se mafutaga faale-Tusi Paia foi na faasa ma tapu i totonu o le nuu o Saipipi, na oo foi i le faamasinoga ma faia ai le faaiuga, e le talafeagai le faaiuga a alii ma faipule faapea, e na o le tolu ekalesia e taga i totonu o le afioaga.
O se faamasinoga foi na teena ai se faaiuga na faia e le faamasinoga o talosaga apili a le Faamasinoga o Fanua ma Suafa lea na faaalia ai, e pule alii ma faipule o Saipipi pe toe talia le mafutaga faale-Tusi Paia pe leai.
O le failautusi o le Fono a Ekalesia Soofaatasi o loo filifilia i le komisi suesue o loo silasila i lenei mataupu, ma ua mae‘a ona faaalia sona finagalo e faapea, o se gaioiga talafeagai ua faia e le Malo ina ia toe Iloilo le saolotoga o lotu ma tapuaiga, ona ua tatau ona lava lotu ua i totonu o Samoa.
O loo silasila le komisi pe tatau ona toe fausia ni tulafono e faatonutonu ai le faaulufale i le atunuu o tapuaiga, ae pe faamata foi o ā ni aafiaga o ia tulafono ma feagaiga faavaomalo ua sainia e Samoa. O le masina fou e tuuina atu ai se fautaga a le komisi suesue ma sana lipoti i le kapeneta.
