Ole Aso Gafua, 19 o Setema na amata aloaia ai galuega ale Konesula o Samoa ma lona ofisa i lona Fale fou i Magele, ma ose fiafiaga tele lea ile paia male mamalu o Samoa oloo alala ma papaaao i Aukilani i Saute, ile faigofie male saili gofie ole ofisa o Samoa e pei ona iai nei. Ua leai se oi ile faigata ona feoai ile mamao ole alu atu ile ofisa tuai sa iai.
Aemaise o atugaluga sa iai ile saili gata o paka o taavale male taugata ole totogi o paka o taavale pe a asia le ofisa sa iai mumua i Karangahape Road.
Ole taimi nei la o lea ua maua lea faamāmā avega mole lautele ole atunuu i lea tulaga.
Ile saunoaga ale afioga ile Konesula ia Faolotoi Reupena Pogi, o tiute ma faiva masani ale ofisa e pei ona iai i lona ofisa tuai ile city, o tiute lava ia oloo tauaveina pea i lona ofisa fou i Magele e pei ole faiga o Tusifolau, Pepa Fanau ma isi auaunaga masani.
Oloo faaauau foi le faatalatalanoaina o nisi o kamupani iinei i Aukilani oloo latou fia faaaogā nisi ofisa ole fale, ae se‘i vaganā ai le kamupani mai Samoa le Samoa Stations o lea ua mautu mai lo latou faaaogāina ole fogafale pito i lalo.
Ma e iai foi le talitonuga ole afioga ile Konesula ole a matuā pisi le ofisa ma faatumulia ile tele o aso ile mamalu ole atunuu, auā o lea ua latalata ma saili gofie le ofisa.
O numera ole telefoni ma emeli ale ofisa, o nisi ia vaega oloo faatumauina pea ile taimi nei, faatasi ai ma aso ole vaiaso ma itula faigaluega, e tatala ile Aso Gafua e oo ile Aso Faraile mai le 9 ile taeao e oo ile 4 ile afiafi, ae se‘i vaganā ai le pusa meli lea ua suia ile PO Box 43244, Mangere 2153.
Ile auai atu iai ole sui ole tatou nusipepa ile ofisa fou lenei ole Konesula na molimauina ai le matagofie o totonu ole fale, ua lē gata ile ofisa ole Konesula ae o ofisa taitasi oloo autovaa atu iai le atunuu mo mataupu e pei ona galue ai le tamaitai ia Lana Palelei. Sa molimauina foi le lolofi atu ole mamalu ole atunuu mo a latou mataupu oloo moomia ai le fesoasoani ale Konesula ma lona ofisa.
Ole isi fale o Samoa ole tasi lea vaega o lea ua faaopoopo atu, mo galuega ale ofisa ma o lea ua iai le fuafuaga ale Konesula ole a tuuina atu le avanoa ile mamalu ole atunuu poo ai e mananao e fia faaaogāina mo ni faalavelave poo nisi lava vaega e moomia ai ona faaaogāina.
E lē o toe po se lilo ile taimi nei ile utiuti o nofoaga oloo mafai ona faaaogā mo mea fai ale atunuu. Ole Maota Samoa fou, ole a fesoasoani lea i nisi o nofoaga e pei ole Malaeola, ole a tali atu i manaoga ole atunuu mo nofoaga e faatino ai fuafuaga fai.
