O le mae‘a ai o le faamanatuina o le aso malolo a Ausetalia i lona Aso Toonai, na toe tatalaina ai taualumaga uma a le nuu poo le mafutaga ua igoa o le Tofā Saili.
Mo le silafia, o lenei faalapotopotoga ua tuufaatasia lea e fesoasoani foi i nisi o le atunuu i le aganuu faa-Samoa.
E fiafia lava lenei nuu e faasoa atu ma talatalanoa i soo se tasi i tulaga o le aganuu.
O nisi o mataupu e pei o faalupega, tua o le tanoa, lauga, faatau (sivaloa), sii i maliu, faalupega ma saofai, ifoga, gafa o Samoa, talatuu a le atunuu ma gagana faafaleupolu.
O le tele o i latou ua ofi mai i totonu e faaaogā tatau i ai lo latou taimi e toe faamanatu ai pea vaega tāua a Samoa ua tauau ina galo atu i atunuu i fafo, ae faafetai o loo maua pea nei avanoa e fefaasoaa‘i ai ma nei tamalii ma failauga o le atunuu.
E maua foi le avanoa i ni matai faapea nai alo ma fanau poo tupulaga fai a‘e a Samoa e fia a‘oa‘oina ni lauga pe afai e uosili i ni faaipoipoga, filifilia faapitoa foi e lauga usu ma lauga tali i ni aso faapitoa a a‘oga, ma aso o autalavou o loo ua iai nei le faamamaavega e fia fesoasoani atu ai le nuu a le Tofā Saili i ia vaega uma.
O le feiloaiga la sa faia i le Aso Toonai na tea nei sa muai tatalaina i le aliitaeao ma pati foi le ‘ava masani ona alo lea o le nuu i fuafuaga uma o lenei foi tausaga fou.
O le laumua lava o le Tofā Saili sa faataunuuina ai le faatasiga, o le maota lea o le afioga ia Taefu Patea Pesamino ma le faletua ia Tina Taefu. Sa faavai ai le manufata auā le auvalaaulia ma le nuu.
O le laulauafono o lenei tausaga e pei ona filifilia nei: Taitaifono – Taefu Maaelopa Pesamino Taefu; Sui Taitaifono – Leuli Silifai Anamani Logo; Failautusi – Tapuala Taumaloto Faalelei; Teutupe – Taituuga Ionatana Selave.
O nisi o mafai ona iai ma faamaopoopoa lenei nuu e pei o le Afioga Taefu Ilalio, Seiuli Pesa Ilimaleota, Seiuli Welfare Nautu, Pitoamoa Lefua, Pipi Tiatia Viliamu, Tuitumua Pio Mikaele, Tuimaugapo Seve Tautali Paese Tautiepa, Foe Faalelei, Afioga Salā Kelemete, Togia Tauai Ugapo, Tumama Sio.
O nisi nei o tina ma faletua ma tausi, e pei o Tagiilima Leuli Logo, Fia Taefu Mika, Laupua Metotisi Faalelei, Anevili Uati Ugapo, Maria Selave, ma Tina Taefu.
