“O le mea e iai le loto, e iai le auala e fai a‘i.” Ua tatalaina nei i le aai o Melepone se auaunaga a se tasi o alo sailimalo o Samoa, le susuga ia Darran Von Heiderbrandt, mo le faatauina atu o se tasi o taumafa Samoa, le panipopo.
E fa ituaiga panipopo eseese ua gaosia ma faatau atu i lana auaunaga poo lona faleaiga, e aofia ai panipopo sukalati poo le chocolate, lemon and lime, cinnamon ma le panipopo peepee ua masani ai le mamalu o le atunuu, ua mautu nisi o faleoloa ma pisinisi ua faatau atu i ai panipopo a le susuga a Darran.
Na ia saunoa ua alumia ana panipopo ona o le eseese o flavours, ma le isi itu tāua, e mafai ona kiliva pani fou, ma pani e faafulisa (frozen), o le faamoemoe ma lana miti, ina ia mafai ona kiliva i isi setete o Ausetalia, ma isi atunuu ma faatauina ai le panipopo Samoa.
Na saunoa foi Darran, o le toatele o le mamalu faatau i lona faleaiga e lē o ni Samoa, ae ua faalia le faafiafiaina o nei tagatānuu eseese i le ese foi o le tofo ma le manaia o le panipopo Samoa.
O le moemitiga a le “Heiderbrandt Panipopo”, ina ia tofo atunuu eseese o le lalolagi, i taumafa na fofoa mai lima o tuaa ma tagata Samoa.
Ua iai le faamoemoe e fia faalauiloa i le aai o Sini ma Perisipeni a o lei mae‘a le tausaga nei, ona faasolo atu ai lea i Aotearoa i le tausaga fou ma oo atu ai i tulu‘iga e fa o le kelope. O le susuga a Darran na soifua ma ola ae i le afioaga o Alamagoto, ma na aoga i le aoga a Malisi i Mulivai.
O ina na amata tofo ai i le manaia o le panipopo sa masani ona faatau i le faleoloa o Emelio e pei ona sa iai, ma amata fofoa mai ai lana miti e pei ona galue ma faatino nei. E mafai ona faafesootai Darran i le (03)88122383.
