Amata faalautele e le Atua le taleni a le Nesian Pearl i Melepone

O le Aso Toonai na tuanai atu na maua ai se feiloaiga a le Samoa Times i Melepone ma le tamaitai ia Filomena Wairasi o le taitai o le Ausiva a le Nesian Pearl, na ia saunoa ai i le tele o valaaulia o faatoai atu e faafiafia ai ma faalauiloa le taleni siva faa-Samoa moni ua foaiina e le Atua mo ia ma nai ona uso.

E lē gata i faamoemoega a le mamalu o Samoa, ae o le tele o faamoemoe a isi atunuu, pei ona iai le Aso Toonai talu ai, na mae‘a ona faafiafia i le faamoemoe o le aiga Samoa ma Argentina i le aoauli, ae na valaaulia foi i se faamoemoe o ni tagatānuu o Ethiopia i Aferika.
Na saunoa Filomena o le faamoemoe pei ona valaau faaaloalo atu ai tagata Aferika, ona o se manaoga e fia tuu faatasia se leo tuufaatasi o tagatānuu eseese o nofoia Melepone i se tusi (petition) e faaleo ai le tetee i le tagatavaleina ma le fasiotia faamalosi o tagata i Ethiopia ae ave faamalosi e le malo fanua ma mea totino.

Na auai sui o le faalapotopotoga mo aiā tatau (human rights committee) ma o latou lagolagoina le sainia o le tusi tetee, o le faamoemoe ma talotaloga ina ia momoli le tusi lea e faitauina i se tasi o fono tele a taitai o malo tetele e usuia i Amerika i se taimi o i luma.

O lea la tuufaatasiga na faia i le Aso Toonai, na faafiafia ai ma ausiva mai nisi o atunuu eseese, lea na saasaa ai ma tausala Samoa e faailoa le lagolago ma fia tutufaatasi ma ia foi tagatānuu, e ui ina eseese tu ma agaifanua, eseese gagana ma lanu, ae ua avea le aai o Melepone ma o tataou nuu e tasi. Tau ina ia faalautele pea e le Atua lo outou valaauina.

Nesian Pearl i se tasi o faamoemoe i le Aso Toonai talu ai Nesian Pearl ma le ausiva Aferika