Ua iai se kamupani i Kalefonia i Amerika ua saili nei ni uta talo mai i Samoa.
E 600 taga talo ia ua amata ai lenei fefaatauaiga, ma e tatau ona oo atu i le faaiuga o le vaiaso lenei ua agai le uta muamua o ia talo i Amerika.
O le igoa o le kamupani o Manai, e iai sona ofisa i Long Beach i le setete o Kalefonia ma o le kamupani lea ua fesootai ma le Matagaluega o Faatoaga auā lenei faitotoa ua tatala mai mo le ‘au faifaatoaga talo.
O le ituaiga talo lea e ta’ua i Samoa o le Talo 1, Talo 2, Talo 3 ma le Talo 4 lea ua muamua i ai le uta lea ua sauni le ave atu i Amerika.
O taga talo o ituaiga talo nei, e tatau ona ave uma i le nofoaga o le Matagaluega o Faatoaga i Nuu.
O iina ua asiasia ai talo nei ma iloilo lelei po ua atoatoa le tulaga o iai ia faaeleeleaga auā le auina atu i fafo.
E lei lava se uta lea na fuafua e amata ia Novema ae o lea la ua faato’ā maua le atoaga o le uluai uta, lea ua sauni ai nei mo le amataga o Tesema.
E $42 (tala) i le taga talo e 20 kilokalama, le mamafa ae $50 tala le tupe e maua i le taga talo mai i Savaii.
O se feiloaiga a le kamupani lenei ma le au fai maumaga i Upolu ma Savaii na fai sa’o ai lava le aufaifaatoaga i le Manai e moomia lava le totogi muamua, o latou ae lei faia taga talo.
E taitasi i le masina lea ua faamautu ai le uta lenei o talo mai Samoa, ma o le manaoga o le Manai ia maua lava le uta lea e $600 taga talo i masina uma.
Faaalia e le alii ofisa sili o le Matagaluega o Faatoaga ma Faigafaiva, Fonoiava Sealiitu Sesega, e toalima lava le aufaifaatoaga e iai maumaga tetele e mafai ona faatumu uta nei i le masina, ae o loo tatala pea le avanoa mo faifaatoaga uma e muamua agai atu ma taga talo ia e moomia.
“A lelei lava le tupe maua a faifaatoaga o le a faaauau foi lenei taumafaiga,” o lana saunoaga lea.
O lea la ua amata ona faalauiloa le manaoga lenei o le Manai, ma e tatau ona agai atu ma taga talo i Nuu auā le suesueina a o lei auina atu i Amerika.
