Amata amanaia le NSW Samoa Rugby Union

Le aufili a NSW Samoa Rugby Union ile mae‘a ose tasi o a latou taaloga
Le aufili a NSW Samoa Rugby Union ile mae‘a ose tasi o a latou taaloga

Ua amata nei ona silafia e tama taaalo lakapi Samoa i Sini faapea kalapu le maopoopo ua tulai mai ai nei NSW Rugby Union oloo faauluulu ile Faatonu le susuga Kolose Feaunati ma lona lagolago ia Alisi Leao. Saunoa Kolose ua loa se taimi o faatulaga mai le kalapu ma ana ‘au a‘o lenei ua vavala mai le amanaia e tagata taaalo ma tapuai.

“Ose mitamitaga le vaai atu ile toatele o tama ma teine lakapi Samoa i Sini nei ua mafai ona faailoa a latou taleni mo le silasila a kalapu i Ausetalia nei ae aofia ai le filifiliga ole Manu Samoa.” E eseese foi taaloga ma kalapu na iai muamua nisi e pei ole Lakapi Liki, faapea se tasi o alii volipolo faatoa lakapi lava lea ma ua mausali lona fiafia tele i lana taaloga fou.

E lē gata i lea ua mautu le taamilosaga o lakapi a tamaitai ma e uma le tauvaga ole 2017 e leai se faia‘ina. O ‘au ei lalo ole luasefulu tausaga U20’s ma le ‘au i lalo sefulufitu U17’s oloo tapena ma koleni lava e faatali ai o latou avanoa e siitia atu ai ile isi vasega. O nisi ile U20 ua siitia sa‘o atu lava i ‘au tetele pe a manunu‘a nisi o ‘au sinia.

Ole taaalo ai foi i totonu ole tauvaga NRC poo le National Rugby Championship ua maua ai se tomai faaopoopo o tamafanau Samoa ma ua tatala ai foi avanoa mo filifiliga faavaomalo mo Ausetalia poo Samoa. E lē gata i lea ae ole sao tele o latou nei ile atinae ole lakapi a Ausetalia i soo se matutua.

Ole masina o Oketopa sa fetaui ai foi aufili a Samoa NSW ma ‘au a NSW Tonga, Fiti ma Maori ma ose laasaga tāua aemaise lava le manumalo mataina a Samoa NSW ia NSW Tonga e 47-19 faapea le manumalo ia Maori NSW 23-8 e ui ina faia‘ina ai Fiti e 23-18. Ua fesootai foi le susuga Kolose Feaunati ma le faiaoga ole Manu Samoa ia Namulauulu Alama Ieremia mo ni avanoa mo tama mai Sini mo le ‘au a Samoa.

Ole taimi nei oloo sailia sa latou kamupani lagolago autu a‘o alo atu ile 2017 mo le malaga atu ile taitoafitu ole Sisigafu‘a i Apia 2017, faapea le taitoafitu a tamaitai e malaga i Ueligitone ile 2017. Ae peitai ole faamoemoe lelei lava ole ‘au ole fetauiga ma le Samoa A pe a taunuu mai ile tausaga fou ma silasila iai sui ole Iuni Lakapi a Samoa i tama oloo taaalo nei ile Samoa NSW.