Amata aloaia koneferenisi i le faauuga o faifeau

E silia ma le to‘a 20 A‘oa‘o o le Kolisi Faafaifeau a le Ekalesia Metotisi i Samoa ua faauuina nei, ma ua amata ai mafutaga o le Koneferenisi a le Ekalesia i lenei tausaga. O se faauuga na tumutumu atu i ai aiga ma uo, o sui o matagaluega eseese aemaise taitai o le ekalesia i Samoa ma atunuu mamao. Ua mafai ona molimauina lenei sauniga tāua i le faatautaia ai i le taimi o le koneferenisi tele.

O le laumua o le kolisi i Piula lea na faatautaia ai lenei sauniga tele ma o le mae‘a lea o tausaga e fā o faagasolo aoaoga i tipiloma ma tikeri i le tala o le Tusi Paia (study of Theology) ma le tikeri o le Mataupu Silisili (Bachelor of Divinity).

E fā tausaga ia na aooga ai i latou nei ma o latou faletua ma o le faauuina o le a mafai ai ona agai e tausi nuu pe faaauau foi aoaoga i le tomai lava lea o le Tusi Paia atoa ai le Mataupu Silisili.

O le sauniga lenei na tatala ai ma nisi atinae ma na saili tupe ai lava aoao o le Kolisi Faafaifeau mo le faatinoga. O le galuega muamua o le auala ua mae‘a ona faatā ma o loo taamilo i totonu lava o le Kolisi i lona laumua lea i Piula. O le isi galuega o se isi fale ua faaopoopo i faleaoga a le Kolisi Faafaifeau.

Ua tele foi tausaga o finau lenei Kolisi Faafaifeau ina ia amanaia faailoga o loo maua e ana A‘oa‘o ma o lea ua i totonu nei o le lio o Kolisi Faafaifeau ma aoga maualuluga ua amanaia e le Pulega o Faailoga Faaleaoaoga le SQA a latou faailoga.

Faaalia foi i lenei tausaga le maualuga o faaiuga o suega mo sui nei ua faauu ma o sui nei o le vasega faaiu a le Kolisi ua faamanuiaina i nei faailoga eseese.

Le aso o le faauuga i Piula o A‘oa‘o fou ma o latou faletua