Ole fusi ole WBO a Lupesoliai Laauli Joseph Parker, ua fusi ai Anthony Joshua ina ua manumalo ile la fusuaga i Cardiff. E lei fesiligia le manumalo o Anthony Joshua. Ile faitau a faamasino e to’atolu, 118-110, 119-109, 118-110.

Ole faamasino Niu Sila, Ian Scott na mamao lana sikoa 119-109 mo Anthony Joshua.  E lei fesiligia foi e David Higgins, Kevin Barry ma Parker le faaiuga ole fusuaga. “Ua manumalo le tagata e lelei atu ia te au,” ole tala lea a Laauli.

Ole upu foi lea a Kevin Barry, faapea foi ma David Higgins i talanoaga ile po na mae’a ai le fusuaga i Cardiff. Ae na fesiligia e Barry le taofi soo e le laufali ole fusuaga. Ole manao a Barry ma Lupesoliai, e fusu i totonu o Joshua ae e lē o fafo. Peitai, o taimi uma na taumafai ai e fusu i totonu, na taofi e le laufali. Fai mai Parker ua faamaonia ai ile fusuaga lea le lelei o lona auvae e pei ona “faasalalauina”. Na faailoa foi ele Duco Events ma Barry le mae’a ole fusuaga e lei pa’u lava Parker.

Ole isi tulaga lelei ole fusuaga mo Laauli, ole mafai lea ona ole sao o ana tu’i ile tino o Joshua, aemaise lava le manava. E lei tele ni tu’i a Parker na lavea ai le auvae o Joshua.

E ui na faanoanoa le Team Parker ile mamulu ole fusi a Laauli, ae ua amata foi ona toe tapena latou mo le lumanai. Na ta’ua e Parker ile faaiuga ole fusuaga i totonu ole maea, e toe fia maua e ia se isi avanoa e fusu ai mo le fusi ole lalolagi. E ui ua manumalo Joshua, ae na vaaia le to’a ma le manaia ole fusu a Parker. Na vaaia le vave o ona lima. E oo foi i lana vaai na lelei tele, na maitauina foi le vave o lana ‘alo.

Mai lava ile amataga na taumafai o ia e fusu i totonu. E tele ana tu’i ile tino na sao, ae ole tele o ana tu’i mo le auvae o Joshua na poloka ele Peretania. E iai taimi na sao ai lava tu’i malolosi a Joshua ile auvae o Parker, ae e lei pa’u. A’o le so’a a Joshua o lana aupega aupito lelei lea na osofaia ai Parker.

Ole uumi o lima o Joshua na faigofie ai ona maua le ulu o Laauli. Ae e lei ‘alo foi Laauli mai le sailia ose auala e sao atu ai ana tu’i ia Joshua.

Na ta’ua e Kevin Barry, na iai lona faamoemoe, na pasia loa le taamilosaga lona ono, na manatu ole a manumalo Parker ile fusuaga. Ae na oo lava le malosi ma le lelei ole mānava a Joshua ile taamilosaga 12.

Ole manumalo moni lea mo Parker mai le fusuaga i Cardiff, ole avea ai lea o ia ose tagata muamua ua aveina Anthony Joshua ile taamilosaga 12.

A’o loma le fusuaga, na faatalanoa ai e le Radio Samoa le faletua ia Sala, le tina o Laauli. Na ia ta’ua ai ma lona agaga maulalo, ile tautua matavela a Laauli mo le atunuu, poo le ā lava le faaiuga ia talia e Samoa e na’o le pau lava ole mea ua mafai e Parker i lana taumafai.

E toatele le mamalu ole atunuu mai Samoa ma Niu Sila na auai ile fusuaga. E matautia le vaaia ole 80,000 o tagata maimoa i totonu ole malae i Cardiff.