Ua amanaia e le faaao ma le pulega o le Iunivesite o Waikato i Niu Sila le sao o se tasi o tamalii o le atunuu sa avea ma se tasi o uluai tagata Pasefika sa aoaoina ma faauu mai ma ona faailoga i lea Iunivesite.
O le afioga Le Mamea Taulapapa Sefulu Ioane, sa aoaoina i le Kolisi o Samoa ma maua ai lana sikolasipi e faaauau ai ana aoaoga i Niu Sila seia oo ina ulufale i le iunivesite o Waikato i le tausaga e 1971 ma maua ai lona faailoga o le Bachelor of Arts in Humanities i le tausaga e 1974.
O le tausaga e 1976 na toe faaeaina ai foi lona taumafai i le faailoga o le Master of Arts with First Class Honours i le gagana peretania le English literature, ma avea ai loa ma uluai faatonu o le vaega tutotonu o aoaoga mo tagata Pasefika, le Pacific Island Education Resource Center.
E oo mai i aso nei ua suia le igoa o lea ofisa i le Pasifika Education Trust ma o loo iai pea mo le faatinoina o polokalame e faaleleia ai aoaoga mo tagata Pasefika i Niu Sila. O le sao o Le Mamea Taulapapa Sefulu Ioane i le itu i aoaoga e le gata o Niu Sila a o Samoa o se tautua matavela ua amanaia ai e le iunivesite o Waikato e ala i se faailoga o le a tauaao i ai i le vaiaso nei, le faailoga ua ta‘ua o le Distinguished Alumni Award. O le tausaga ua mavae na asiasi mai ai i Samoa ni sui faatonu o le iunivesite ma osia ai se mafutaga ma le iunivesite aoao a Samoa.
O le taimi nei o loo avea lenei tamalii ma Pelesetene o le sosaiete a fitafita sa tautua i vaegaau i le taimi o taua. O se taitai o lea faalapotopotoga o loo ia finauina pea le Malo o Samoa ina ia toe faatāua le aso malolo o fitafita na maliuliu i taua le ANZAC day, ona ua lē o toe iai sea aso malolo ae o loo faamamalu pea lea aso tāua i le sauniga masani o loo faia i lalo o le uati tele i Apia i le aso 25 o Aperila o tausaga taitasi.
O le tele o tausaga o aumau lenei tamalii ma lona aiga i Niu Sila, na ia tuua ana galuega ma tofiga sa galue ai ae toe taliu mai i Samoa ma faamautu ai ma o loo faaauau ai pea lona sao i le tele o polokalame ma atinae eseese.
O se tamalii foi e lauiloa tele i le toaga e savali faamalosi tino i aso uma ona e vaaia pea i taeao o aso taitasi i le taligalu i Apia.
