Ua sauni atu le faalapotopotoga a le Nuanua o le Alofa i lana uluai tufatufaga faailoga i le masina nei e amanaia ai le galuega a i latou e iai manaoga faapitoa o loo galulue i fale faigaluega i totonu o le atunuu.
Pe tusa ma le to‘a 20 sui o le faalapotopotoga o le Nuanua o le Alofa o loo galulue i totonu o fale faigaluega e lē gata i galuega faaofisa aemaise i isi ituaiga galuega totogi tupe.
O i latou la o le a patino i ai lenei faamoemoe e faalagolago i le filifiliga a falefaigaluega o loo latou galulue ai e tusa ai ma taiala o loo faatautaia ai galuega a i latou e iai manaoga faapitoa i totonu o ofisa poo falefaigaluega.
O lenei foi faamoemoe o le a avea ma avanoa i le Nuanua o le Alofa e faafetaia ai le amanaia o manaoga a i latou e iai manaoga faapitoa i totonu o soo se ofisa ma falefaigaluega.
O le aso 18 o le masina nei o le a faatino ai le tufagā faailoga ma o loo iai le faamoemoe e faia i tausaga uma ona ua tele laasaga ua ausia e le Nuanua o le Alofa lea foi ua aloaia le feagaiga faavaomalo e amanaia ai aiā tatau a i latou e iai manaoga faapitoa e pei ona sainia i le masina o Setema i le tausaga nei.
Ua faia faatasi le faamoemoe a le Nuanua o le Alofa ma le vaiaso faavaomalo o tagata e iai manoaga faapitoa lea o le a faamanatuina i le aso 3 o le masina nei.
