Ua 30 nei tausaga talu ona faatūina e le Malo le Iunivesite Aoao o Samoa, o se fuafuaga na amatalia i le tausaga e 1984 a o avea le susuga Tuilaepa L Sailele Malielegaoi ma Minisita o Tupe i le faigamalo a le HRPP, sa avea ai le afioga Tofilau Eti Alesana ma Palemia. I lana saunoaga i le fauuga a le Iunivesite i le vaiaso ua mavae na faaalia ai e Tuilaepa, o ia sa taulamua i le sailia o ni tupe e faagaioia ai le iunivesite i lona amataga, a o le afioga Le Mamea Ropati o le Minisita lea o Aoga i lena vaitau sa mamafa i ai le avega i le tapenaina o le iunivesite.
O le atoa ai la o le 30 tausaga o le Iunivesite Aoao o Samoa ua a‘e ai se finagalo o le Fono Faatonu a le iunivesite e tuuina atu se faaaloalo maualuga i le alii Palemia e ala i le faaee i ai o le faailoga Fomai o le Tofa Manino o le Tamaoaiga. O se faaaeaea foi lea a le pulega atoa o le iunivesite aoao a le atunuu ua amanaia ai le sao o le alii Palemia i le tele o taumafaiga mo le siitia ma le faaleleia o le tamaoaiga o le atunuu, aemaise o se tasi o taitai ua niuali lana tautua e lē gata i Samoa ma ona upufai ae o le va nonofo ai ma malo i fafo i lona tulaga o le taitai o le Malo.
E lei faigofie le faatūina o le iunivesite ona o le tulaga utiuti o tupe maua a le atunuu e pei ona sa faavaeina i le $5 tala seia oo ina maua fesoasoani mai fafo na fausia ai e pei ona sa faatupe e le Malo o Iapani le fausia o le nofoaga atoa ua iai nei i le Papaigalagala i Toomatagi. Ua toatele alo ma fanau a le atunuu ua faaeaina lo latou taumafai i le iunivesite ma ua mau tulaga lelei i galuega a le Malo nisi, a o nisi ua tu lelei i tofiga i atinae tau pisinisi ma isi taumafaiga. Ua faaalia e Tuilaepa lona talia ma le loto maualalo o le faaaloalo ua faia e le iunivesite mo ia, ae o lana luitau i alo ma fanau ia tautuana ia ola aoaoina auā o latou o taitai o le Malo ma le atunuu i le lumanai.
O le faauuga a le iunivesite e lē gata ina sa faaee ai le faailoga fomai o le alii Palemia ae sa faauu ai foi nisi o fanau a Samoa ua maua faailoga maualuluga ma tusipasi i le mae‘a o aoaoga i le iunivesite aoao a le atunuu. O le tausaga ua mavae na muai faaee ai se faailoga fomai mo le alii Palemia lea sa faaaloalo i ai le Iunivesite o Vitoria i Niu Sila.
