Ua lausilafia e soo se Samoa le taumafa o le keke puaa, ma o se tasi o matai‘ai a le atunuu, ae ua iai nei i laufanua o Melepone le auaunaga a nisi o tamaalii le fetalaiga ia Feagaimalii Aukuso ma le faletua ia Vaioleti, o loo maitauina le alumia ma le fiafia i ai o le atunuu, ona o le la keke mamoe, masalo ua leva ona maua ma taumamafa ai nisi vaega o Ausetalia aemaise Niu Sila ma Samoa, peitai o lea e foufou mai i Melepone.
E lei mamao atu se taimi na amata faalauiloa ai i luga o auaunaga leitio le tautua a Moyrah, ae ua maitauina le faatupulaia o le toatele o le mamalu ua valaau atu mo ni oka aemaise lava faalapotopotoga ma Ekalesia, faapea foi nisi o leitio ua mafai ona vaavaalua ma le Moyrahs e fai faailoga o taaloga i pusa keke mamoe, ma o taaloga ia ua taupati le atunuu e vili ma valaau i ai ona o le fia taumafa i le keke mamoe.
O le molimau a la tatou pepa i Melepone, e faatoa talitonu lava ina ua tofo. E momoli ai le faafetai i le tina ia Vaioleti ona o lona sao ua faaopoopo i le fofoga taumafa o le mamalu o le atunuu i Melepone, mo ni oka, ia pe na o le tofo lava foi i le matalasi o le keke mamoe.
O le a silafia atili lenei auaunaga pe a faafofoga i le Apu FM i afiafi o Aso Gafua 6 i le 10 i le 98.5 fm, poo le Samoa matalasi i le 97.4fm i afiafi o Aso Toonai 8 i le 12.
