Alualu i luma atamai faaonaponei o fanau

O le Aso Tofi talu ai, na faia ai se faauuga a nisi o alo ma fanau ua faaiuina manuia a latou taumafaiga i se aoaoga o tomai faaonaponei i matata o le mamanuina o ata e faaaoga ai polokalame o le computer ma le tuufaatasia foi o ata vitiō. O nei tomai uma pe afai e faaauau pea ona laalaa i luma taumafaiga a nei alo ma fanau, e mafai ai ona latou maua metotia e pei ona ua tautaua ma tamaoaiga ai nisi tagata i le itu tau le tuufaatasia o ata tifaga o loo faaalia i televise i nei ona po.

O lenei aoaoga o loo faaautu i le aoga (institute) a le Natcoll Design Technology, ma o le faauuga na faia i le Aso Tofi, e mo fanau o loo latou faaaogaina le faleaoga a le Kolisi o Magele, ae o i latou o loo faaaogaina le faleaoga autu i le aai i Aukilani, sa faia le latou faauuga i le Aso Lua o le vaiaso lava na tea nei. E toalua ni alii talavou Samoa sa faauu mai ai lea aoaoga i le vaega muamua o le tusipasi poo le certificate, o laua ia o Peter Norris ma Charles Su‘a, ma ua tapena atu foi i latou nei mo le isi vaega lona lua, le diploma lea o le a amata i le masina o Iulai.

Faaalia e le alii palagi o loo faaautu i ai lenei aoaoga, lona maofa i le maoae o le tomai ua iai i fanau i nei ona po, ma sa ia fautuaina ai foi nisi o matua na auai atu i le faamoemoe o le fanau i lea afiafi, e taua tele le lagolagosua i le faatumauina o le naunau o fanau i nei tomai, aemaise i lenei vaitaimi o le le mauagofie o ni galuega, peitai o tomai o loo maua mai lenei aoaoga, e moomia tele i galuega i nei ona po, ma e totogi lelei foi pe a oo ina matua lelei ona faatino.

O nisi o mea e mafai ona faaaoga i ai tomai o loo aoaoina i lenei aoga, o le tomai e pueina ai ata ina ia lelei le foliga mai pe a lolomi, faapea foi le pueina o ata vitio, le tuufaatasia o ni ata eseese ina ia fafau ae ai se ata faasolosolo e pei o se tifaga. E aoao ai foi le tomai ina ia iloa ona mamanu pe faatulaga upega o fesootaiga i luga o le initaneti (websites), le mamanuina o ata o lavalava ma soo se teuga (fashions), fale ma meafale ma le tele o isi mamanu o loo faaaoga ai polokalame o masini komepiuta, e le toe tigaina ai le lima e tau lolomi i le peni ma le vase.