Ua atoa lelei le vaiaso o fai finauga a le Vaega o loo nafa ma le tali atu i Faalavelave Faafuasei i lona lala o le Tineimu ma le taumafaiga e tape le tele o afi ua fai lava ma alia‘e i le itu i Matu i Sisifo o le motu tele i Salafai.
E to‘a 20 ofisa o le Tineimu i Savaii o loo faaauau ona valaauina ma nofo sauniuni i taimi uma ona o le ma‘ale‘ale o le tulaga o iai le tala o le tau ua matuā mamago ai nofoaga ia ua fai lava ma alia‘e ai le sasao o le afi.
Faaalia e Seve Tipa Laupe o loo vaaia le Ofisa o le Tineimu i Savaii o le matuā faigata lava o le taimi lenei, ua na o sina aloiafi lava e pipii i le eleele o nofoaga nei ua vaaia ai mu nei ua sosolo solo i le Itu Asau ae sosolo loa ma ua faaaauau lapataiga i le tapu lea ona toe susunu se ta‘inafi a o se isi foi ituaiga afi lava ona o le faigata tele ona tape i le leai o se suavai maua.
Faaalia e Seve Tipa a faaeteete lava tagata uma e pei ona avatu ai lapataiga i le tapu o le toe faamumū o se afi, o le a faaitiitia lava le tulai mai o ni faalavelave faapenei.
Faaalia e Sala Sagato o le Ofisa o le Vaai Tau, e lē o iai ni timuga o valoia mo le faaiuga o lenei vaiaso o lona uiga e matuā faaeteete gata lava ia eleele na vaaia ai le sasao o le afi.
E oo mai i le faaiuga o le vaiaso ua tape le afi lea na tulai mai i Tafua ma na faafetaia sina timu o le Aso Tofi na faigofie ai ona taofia le sasao o se isi afi i lea nofoaga.
Talu mai le amataga o Iulai ua oo atu i le valu le aofai o mu ua faapea ona finau le Ofisa o le Tineimu i Puleono e faatamaia. O mu mulimuli nei i Tafua ma Falealupo e masalomia o ni aloiafi mai i mu na tulai mai i le lua vaiaso talu ai na sosolo ai afi i ia nofoaga.
O mu nei na amata mai lava i Tufutafoe ma Falealupo ma o itu uma ia o le Itu o Asau o loo mātau lelei lava i aso uma e le Tineimu talu ai le faaeteete gata. Ta‘ua e Seve o le lua vaiaso talu ai lea na tulai mai ai foi nisi mu i Falealupo lava na maua e le Ofisa o se tina matua na taumafai e susunu se vaega o lona fanua auā le faamamāina mo galuega fia faatino, ae uma ane ua fiu e tau tape talu ai e leai se suavai maua i lona fanua.
“O le tulaga lava lena o loo iai, e taumafai loa se isi e amata se afi i nofoaga nei e matuā faigata lava ona tau tape ma o le mafuaaga lea o le faamalosia o le tapu ua iai nei,” o se faaaliga lea a Seve.
Faaalia e Sala, o savili o loo faapea ona faamalosia i ia vaega o le motu tele i Salafai aemaise lava savili o loo agai mai i Saute i Sisifo o Savaii, e leaga atu nai i lo le susulu malosi o ‘ave o le la ona o le savili lea e matuā aveese ai lava le susū o le eleele ma atili mamago ai laau.
O le faigata o le galuega a le vaega o Tineimu ona o le itu lea e fai o le faigata o le maua o le suavai ae o nofoaga foi o loo sosolo ai le afi, e moomia le sili atu i le 300 mita le uumi o faagaau e faaaogā mo le tau tapeina o ia mu.
E tele foi ina sopoia nofoaga e faigata tele ona sopoia i le tele o le papa ma e lē o iai ni auala auā le toso atu o le faagaau mo le oo ai o le suavai i ia nofoaga.
Ua tau fai ifo la le galuega a Tineimu ma ua maua se taimi e mapu ane ai. O le isi foi itu lea na ta‘ua e le taitai o le Ofisa i Savaii, a vaivai tineimu e lē mafai lava ona lē tulai mai nisi luitau ma faafitauli a o tauivi ai ma le faatama‘ia o mu, ma o le mafuaaga lea o le taumafai lava ina ia lava le mālōlō mai i galuega faapea, ae e lē o tuua ai le vaavaai, toe asiasi ma ia fesootai pea ma i latou i afioaga nei e vave logo atu le Tineimu pe a vaaia loa le tulai mai o se mu.
O le talotalo a le tineimu faapea foi le Vaaitau ina ia iai ni timuga e taumafai ai e faasūsū le eleele ma taofiofi ai le tulai mai o nisi mu tetele e mautinoa le faigata ona tape.
