O le tausaga ua mavae 2014 na malaga mai ai i Samoa le tamaitai Ausetalia o Janice Bradnam e auai i se aoaoga sa faatino e le To’omaga mo ē Puapuagatia. Na feiloai ai ma le Peresetene le susuga Siliniu Lina Chang ma ave ai e le peresetene ma faailoa i ai nofoaga o loo tausia ai fanau ua sauaina faapea le nofoaga o loo vaaia ma tausia ai fanau pepe ua tuulafoa‘ia ma sauaina. Na oso ifo ai lagona o le loto nutimomoia o lea tamaitai ona o le alofa i fanau pepe ona e iai faaletonu i le nofoaga o loo tausia ai. E lē gata e laitiiti ae ua lē saogalemu mo lo latou soifua maloloina.
Na fesili ai loa i le peresetene poo le ā se mea e manao na te faia ma o le tali o se nofoaga lelei e sili ona saogalemu mo le tausia ai o fanau pepe e sefululua o loo i le vaaiga a le Toomaga, aemaise o nisi o pepe o fanau a nisi o fanau teine na aafia i sauaga ma faiga solitulafono.
Na foi i Ausetalia Janice ma amata loa ona tapena le galuega ae o Fepuari o le tausaga nei 2015 na amata ai loa ona faatino. O le Aso Faraile, 17 o Iulai 2015 na tatala aloaia ai loa le galuega. O se maota matagofie ua fausia i se ata e fetaui lelei ma le tausiga o fanau pepe. Ua iai le umukuka e saunia lelei ai a latou meaai.
O le vaega e faamamā ai lavalava ma isi vaega mo pepe, aemaise o le faleta‘ele, o meataalo eseese, ae o le vaega i fafo o le lotoā ua iai foi isi vaega manaomia e fanau e pei o suigi ma isi teuteuga o vaega e faia ai a latou taaloga. A vaavaai i ai ma silasila foi le atunuu e afea le nofoaga e maofa i le seleni na faaaluina e lenei Samaria agalelei o Janice ona e taugata ma anagata vaega uma o le nofoaga.
Ua faailoa e le tamaitai, o le tausaga fou o le a toe foi mai ai e faia se isi galuega o se fale mo fanau laiti ua matutua ua maua le ta‘i lima i le ono tausaga e oo i le sefulu. O se faafetai lea mai le ta‘ele o le fatu ma le agaga o le Peresetene o Siliniu faapea le faatamā le afioga i le Minisita o Fesootaiga, le Afioga Tuisugaletaua Sofara Aveau. O ai na iluilu talutalu e iai se Samaria agalelei e ofo e na te faatupe se galuega faapea mo le lelei o fanau a Samoa ua aafia i sauaga ma ua tuulafoa‘ia.
O le molimau a nisi na auai i le tatalaga o le nofoaga, o nisi ia o galuega ua tatau ona agai i ai Ekalesia malolosi i le atunuu, o le faaalu o nisi tupe o faiga taulaga a tagata e faatupe ai ni fesoasoani faapea. “O i e faamautu ai le alofa o loo laugaina pea i aso uma”. O le tala faamama‘i mai lea a se isi tina ua lē manao e faailoa lona suafa.
