Na matuā faanoanoa le matamataga a nisi o i latou e lagolagoina le Toa Samoa i le sau o le polokalame TV a Ausetalia le Footy Show i po o Aso Tofi e aunoa ma se faamatalaga auiliili ma se toe tepa i tua e iloilo ma faafetaia le sao o tama Samoa ma Tonga i le lakapi liki faavaomalo i le uma ai o le taaloga a Samoa ma Tonga i le Gold Coast.
O lenei polokalame ua tele faailoga e ave i ai e tagata Ausetalia i le auaunaga o le lakapi liki ae peitai sa lipi ma le faaemoina mai o se sikoa se tasi o lenei taaloga i la latou polokalame.
Pau nai sekone e tolu na emo mai ai le lavea o Tim Simona e tau faamatala ai le aafia o tama taaalo i lea taaloga. O le isi 3 sekone o le pese lotu a Fiti na usu a o lei amata la latou taaloga ma Papua Niu Kini.
I le molimau a le Leitio Samoa FM89.3 Samoa Sportstar i Sini nei o se lē faaaloalo lea i le taaloga faalevaomalo auā o ‘au nei a atunuu o le Pasefika o loo iai tama taaalo ua loa latou sao i au kalapu a le NRL faapea foi i Niu Sila.
O se tasi o manatu o ‘au a Niu Sila, Ausetalia, Egelani ma isi atunuu malolosi a malaga atu i le Pasefika o le a ave uma i ai le faaaloalo ma ripoti lelei i le lelei e mafai ai leitio, nusipepa ma televise a atumotu ae peitai e lē taitai malaga atu auā e popole toe iai atugaluga i faia‘ina mai totonu o le Pasefika.
O le polokalame lava lenei a le Footy Show na fesiligia ai foi se tasi o faatalanoaga a le alii fai mea mālie ia Beau Ryan ma le afioga Seiuli Dwayne ‘Rock’ Johnson mai Amerika lea na sosopo ai Beau Ryan ma ia faifai i le Rock o se fana taavili (Machine Gun) e tatau ona faaumatia ai uma popo poo kokonati.
Sa soisoi le aumaimoa palagi i lea taimi ae o nisi mai le Pasefika ma Samoa na toatamai i le tulaga lē ava o Ryan ma ana saunoaga e foliga o loo faatauemu i le faasinomaga o le afioga Seiuli.
I le tuufaafeagai o lenei faatalanoaga ma Seiuli Rock, na matuā vaaia le solotetee o tagata papalagi i Sini Sisifo nei i le TV SBS talu ai le faaalia o se ata e uiga i tagata ma aiga papalagi o nonofo i vaega o Mt Druitt e ta‘ua o le ‘Struggle St.’ i luga o le TV.
O le faaseā na tuuina atu i le TV SBS o le toatamai ma le matamuli o i latou nei i le soifuaga faigata o nei aiga i le ata. O nisi e silia ma le luasefulu tagata e nonofo i se fale o le malo, faaaogā vailaau faasāina ma le ‘ava malosi, o nisi talavou sefululima tausaga ua sosola ese ma mātua ma nonofo solo, tagata aporiti o loo tolauapi i le togavao ma soifua i le tausasami i manu felelei ma manu fetolofi faapea tina taitoatasi (single moms) ua fiu e saili galuega.
O se solotetee i lea ata TV na vaaia ai le sefulu loli lapisi na omai lava mai Blacktown e poloka le fale TV SBS e faailoa atu ai lo latou tetee ma faaigoaina lenei ata o le lapisi ma sa lē tatau ona faalauiloaina ua maasiasi tele ai.
Na saunoa i latou i tusitala e lē faapea uma soifuaga o Mt Druitt ma e toatele tagata faigaluega lelei ma tu lelei. Sa tali fuaitau le SBS ona o nei tagata o loo faailoa e le polokalame ia maua ai se malamalamaaga tainane se fesoasoani.
Ua moni ai loa le saunoaga ua leiloa poo ai e talia a latou faaseā a o ai foi e ave i ai le faamuamua a polokalame nei a TV e aofia ai le Footy Show. Na saunoa se tasi tama Samoa o le musu a le Footy Show e faailoa le taaloga a Samoa ma Tonga i te‘i ua atili teufatu ai i fanau Samoa ma Tonga le maoae o le alu i luma a le Toa Samoa ma Mate Ma’a Tonga ma atili tosina ai e fia taaalo mo le Pasefika i le lumanai talu ai le faia‘ina matagā a le Kangaroo i Suncorp.
