O se tasi o Polokalame a le Pacific Business Centre ma le University of Hawaii na faataunuuina i le vaiaso na tea nei, sa latou faatāua ai ma momoli la latou faaaloalo tele i le sao o le tele o nisi o sui mai le Pasefika.
E to‘avalu tamaitai ma sui eseese mai atumotu taitasi o le Pasefika e pei o Fiti, Rarotonga, Hawaii ma isi malo o le Pasefika sa momoli i ai le faaaloalo a le University of Hawaii e ala i le polokalame o le ‘Stars of Oceania’. Mai i lea to‘avalu, e na o le toatasi le sui o Samoa sa faapaleina ma momoli i ai le faaaloalo a le Stars of Oceania, o le afioga ia Vaimasenuu Zita Martel. Na faaalia e le polokalame lenei, o le faaaloalo na tuuina atu i le afioga ia Vaimasenuu, sa faatāuaina ai lona sao o ia o se taitai sa ia taimua ma le lototele. E lē gata o ia o se tina ae o se tamatai foi ua iloga lona tomai ma le agavaa i le faafoeina o pisinisi.
Ae o se tasi foi o sao tāua o le Afioga Vaimasenuu, o le tulaga sa ia faaofiofi atu ai ma ia ausia aemaise lava o le a‘e faiva manumalo i se tasi o faagatama sa amata mai o avea ma nafa o taulelea, le faagatama o tuuga ma alogā fautasi. Ae ina ia ua pale mai le afioga ia Vaimasenuu ma ia ausia ia tulaga e pei ona iai i le Tuuga Fautasi o le faailogaina o le 50 tausaga o le Malo Tutoatasi o Samoa, o se tulaga maoa‘e lea i le maitau foi a isi atumotu o le Pasefika.
O le saunoaga faafetai foi a le afioga ia Vaimasenuu ina ua tini ma le malo lana faatautaiga i le tuuga fautasi lea, ua avea ai foi o ia ma faataitaiga lelei i le maitau mai a le tupulaga talavou o loo latou mataituina ia tulaga.
O le Polokalame o le ‘Stars of Oceania’ na amata faavae mai e le Iunivesite o Hawaii i le tausaga e 2006 ae taitolu i le fā tausaga ma faatino. O se taumafataga tele e masani ona tapenaina ma valaaulia ai foi le tele o taitai o le Pasefika pe a oo ina faatinoina lenei Polokalame, ma o le tausaga lenei, sa faatinoina ai lenei faamoemoe i le Hale Koa Hotel i Waikiki, Hawaii.
