“Tulai ia auā ua oo mai le malamalama, Le Alii e, e moni lava, a matou lē liliu atu i lau afio ma lē faamaoni ia te oe, e galulue fua i matou, ae faafetai i lau faasinomaga ua maua ai le avanoa e liliu atu ai e tapuai fiafia ma le loto saoloto. Ia outou pepese atu i le Alii i ana vavega ua faia mo i tatou.”
O upu tomua ia na saunoa i ai le susuga i le taitai aoao o le Ekalesia Metotisi Fou ia Rev Petaia Setu e amata ai le sauniga o le faapaiaina o le ekalesia i Henderson i le Aso Sa ua mavae 10 o Aukuso.
Na faatumulia le hall a le kolisi o Waitakere i le faletolu a lenei Pulega, e aofia ai le Papatoetoe ma Manurewa faatasi ai ma le ekalesia fou lenei ua faatuina. Sa mafai foi ona auai nisi o sui mai isi ekalesia e molimau faatasi lenei sauniga faapitoa.
O le susuga lava i le taitai aoao ia Rev Petaia Setu na taitaia le sauniga, a o viiga o le Atua na peseina e ekalesia taitasi o le faletolu i Aukilani. O le tatalo na fofogaina e le faafeagaiga o le matagaluega i Papatoetoe ia Rev Iosefa Maiava.
A o le susuga i le faafeagaiga ia Fatu Manu o le matagaluega i Manurewa na faitauina le Tautinoga. Na vaaia ai foi le matagofie o tapenaga a aulotu taitasi e ala ia latou faaevagelia na faatinoina e avea ma molimau o le aso ua aloaiaina ai le faapaiaina o lenei galuega.
Na sosoo ma le folafolaina o le Upu a le Atua e lana auauna, na faamamafa lava le saunoaga a le taitai i le faafetai ma le faamalo i le Misionare ma lona faletua aemaise o le Ekalesia ona o le finau ma loto tetele i le galuega a le Alii.
O le tala i le galuega na saunoa i ai le susuga i le Misionare ia Mafua Kolose, ma na ia ta‘ua ai le faigata ma le lavelave o le amataina o le galuega, ae faafetai i le Atua i lona fesoasoani mai ua sologa lelei ai ma manuia mea uma.
O le aso 11 o Me 2014 na la faamavae ai ma le galuega i Papatoetoe ae see atu ma toe amata le galuega Faamisionare i le aso 12 o Me. Na iai ni vaega mālie o le galuega a le Atua, na muamua sue se hall ae mulimuli saili tagata, ae na ia mautinoa ua saunia e le Atua tagata mo lana galuega, ma e toalua ni tulafale sa latou galulue faatasi i lea taimi.
O le aso 12 o Iuni na maua ai loa le hall a le kolisi o Waitakere ma sainia ai loa le maliliega ma le Pule e $75.00 e faaaogā ai le hall i le 3.5 itula i le 1:30 i le aoauli o Aso Sa taitasi. E fitu matafale na amataina le lotu, ma o le faasalalauga muamua na auai atu ai le isi aiga fou, o le faasalalauga lona lua sa faapena ona faaopoopo atu ai le isi matafale seia oo mai i le taimi nei ua 11 aiga lotu ua galulue i totonu o le Ekalesia Metotisi Fou i Henderson.
Na momoli foi le faafetai a le Misionare i le susuga i le taitai aoao ia Petaia Setu ma le faletua aemaise o le faletolu i Aukilani ona o le lagolago malosi i le taumafaiga o le galuega. Sa faapea foi ona afea i lana faafetai le tautua ma le auaunaga a ualesi faasalalau ma le nusipepa ona o le faalauiloaina ma le faasalalauina o le talalelei. Na faaiu le sauniga i le faamanatuga ma peseina ai loa le pese mulimuli e le ekalesia mai Manurewa.
Na toe faaauau le mafutaga i le iputi o le afiafi na tapenaina e le matagaluega i Henderson, sa faapea foi ona momoli ai ma ni meaaalofa tupe mo i latou, auā o toa i latou o le galuega a le Atua i Aukilani Sisifo, o le latou taeao muamua foi lea talu ona amata le ekalesia.
O le susuga i le failautusi ia Vaa Aoao Siausane sa fai ma fofoga o le ekalesia i Henderson e momoli le faafetai i le faletolu ma sui o isi aulotu sa auai, aemaise o le taitai aoao o le ekalesia Metotisi Fou i Samoa ma Niu Sila nei le susuga ia Rev Petaia Setu, ona o le faatasi atu e molimau lo latou taeao fou.
Sa faapea foi ona toe faaopopo iai ma le saunoaga mulimuli a le susuga i le Misionare ma tatala ai loa le fili alii.
