“O le a faatali se finagalo o le nuu ona fofogaina ai lea o se faaiuga a le faamasinoga”… Patu Falefatu Sapolu
O le eseese o faamatalaga a sui o le aiga o lē ua molia ma le faamatalaga a lē e ana manu papalagi pe o povi na aafia i le solitulafono, aemaise o le finagalo o Alii ma Faipule o Pu‘apu‘a i se togisala mo lē ua molia ona o le faatasina o le igoa o le nuu i lana solitulafono, ua manatu ai le faamasinoga e toe tolopo sana faaiuga mo le afioga Lemamea Emosi Puni.
O le fofogaina o le mataupu i le Aso Lulu ua mavae na tuuina atu ai folasaga a le itu a leoleo ma le loia a le afioga Lemamea Emosi mo se iloiloga i se faaiuga i moliaga o le gaoi faasino i manu papalagi na fasi mate e lē ua molia ma ave faatau.
Na talosaga le alii loia o Patrick Fepuleai o loo tulai mo lē ua molia, ina ia silasila le faamasinoga i itu lelei o lē ua molia e pei o lona ave o le lua afe tala ma se povi mo lē na tagi. Ia silasila foi i se finagalo o Alii ma Faipule o Pu‘apu‘a ona ua logoina lē ua tuua‘ia ma lona aiga o le vaiaso nei i le fono masina a le nuu e faia ai se togisala.
Peitai na sii le aao o se tasi o matai o le aiga o Lemamea Emosi mo se avanoa e faia ai se faamatalaga lea na ia faailoa ai e faapea ua mae‘a ona feiloai lo latou aiga ma le aiga o le tamā e ana povi na aafia, ma faia ai le faatoesega. Na ave ai foi le tupe e $2,000 ma le povi e tasi.
Ae sa tapa e le faamasino sili le afioga Patu Tiavaasue Falefatu Sapolu se finagalo o le tamā o Siaosi Apelu o ia e ana povi na aafia i le solitulafono. “Lau afioga ma le mamalu o le faamasinoga o le aso 23 o Setema i le po po ua tea le iva, na oo atu ai lē ua molia ma nisi o lona aiga ma matou feiloai. O le seleni na avatu o le faaupuga e fesoasoani ai i le faalavelave o le maliu o lo‘u uso, ae o le povi na faapea mai e fesoasoani foi i le faalavelave”.
O le faamatalaga lea a Siaosi na saunoa ai le faamasino sili ma ia faailoa i le loia a Lemamea, e matuā eseese folasaga ua tuuina atu ma le faamatalaga a lē e ana manu papalagi. Peitai o le saunoaga a le alii loia, o vaega ia na logoina ai o ia e lē o loo molia.
“Lau afioga o le faaaliga lena mai la‘u kalaieni (client)”, na saunoa ai le loia. O le finagalo i le faasalaga a alii ma faipule na faaalia e le matai o le aiga o lē ua molia i le faamasinoga, ua oo atu le savali a le nuu ma ua faailoa atu e sauni lo latou aiga i le sala e selau aumatua. Ae na saunoa manino le faamasino sili e lē talia e le faamasinoga ni faamatalaga o ni mea e lei faataunuuina, ona talu ai e faatāua e le faamasinoga se faaiuga a alii ma faipule. O le aso 15 lea ua tolopo i ai le faaiuga a le faamasinoga ma ua faailoa e le faamasino sili e tusa pe oo atu i le aso lea, e lei faia se faaiuga e lauina lava se taunuuga o le a oo i ai se finagalo o le faamasinoga.
Na tetee Lemamea Emosi Puni i moliaga, ae na faamaonia e le faamasinoga ina ua lagolagoina mau a le itu a leoleo.
