Na uigaese lagona ale All Blacks i Sini, Ausetalia ile po ole Aso Toonai ile taaloga ale All Blacks ma le Wallabies a Ausetalia. Aemaise ai le matautia ole manumalo ale All Blacks i ‘ai 54-34.
Sa tatau ona ea ea mai i luga lagona ole pulega ale All Blacks ile matautia ole taalo ale ‘au. Peitai, na faaleogalua lea po, ona ole tele o faaletonu oloo feagai ma le ‘au. Faaletonu ia e iai le mataupu oloo fesiligia ai le alii o Aaron Smith e uiga i tamaitai.
Ole mataupu lea na aliali mai ia Jerome Kaino e faasino foi i tamaitai. Faaopoopo iai ma le toe aliali mai ole mataupu mai le tausaga ua te’a lea na faasinosinolima ai le All Blacks ia Ausetalia ile taumafai e faalogologo nanā i fono ale All Blacks ile faletalimalo.
O nei mataupu e tolu, na avea ma mea mamafa ile talanoa ale faiaoga ale All Blacks Tupuivao Steve Hansen.
Mo le silafia, ole mataupu ia Aaron Smith ma lana feusuaiga ma le tamaitai ile fale-lē-ta’ua i Kalaiesetete ose mataupu tuai. Ae ua toe aliali mai ona ua taumafai le tamaitai na fesiligia e faamamā lona igoa.
Fai mai a ia, na taumafai Smith e totogi atu ia te ia se vaega tupe e pepelo ai o ia ile mea na tupu. Na taumafai Smith e sui le tala ale tamaitai, e ta’u e lei faia ni a la feusuaiga i totonu ole fale-lē-ta’ua. Ae na musu le tamaitai lenei e fai se tala faapea auā fai mai a ia e le sa’o.
Ole tala lena na taimua i ripoti mai Sini ile amataga ole vaiaso na te’a nei a’o loma le taaloga ma le Wallabies. Ae oo ile Aso Tofi pa mai le tala ia Jerome Kaino ma le isi foi tamaitai e le o lona to’alua faaipoipo.
Na te’i ane, ua lei filifilia Jerome mo le taaloga ma le Wallabies, ae mulimuli faalele le ripoti ile nusipepa i Ausetalia e faaseā ia Kaino ma lana mea na fai. Na malaga ese ai o ia mai le ‘au ma toe foi i Niu Sila e taumafai ina ia fofo lea faaletonu ma lona aiga.
Na faaopoopo ripoti faaleaga ile All Blacks ile Aso Faraile ile ripotia ole faaiuga ole faamasinoga ole alii sikulati ale All Blacks mai le tausaga ua mavae. Ole faaiuga, na solofua ai moliaga faasaga ile alii o Adrian Gard.
O tala mamafa ia e tolu na faamuamua ele aufaasalalau a Ausetalia ile taimi tonu a’o tapena le All Blacks mo le taaloga ma le Wallabies.
Na musu foi Tupuivao e fesiligia o ia i mataupu ia e tolu. Ae na taumafai lava sui ole autusitala e faaofi atu fesili e uiga ile toe foi ai o Kaino i Aukilani.
Na vave tapunia ele pulega ale All Blacks le fesiligia o Hansen ile po ole Aso Toonai ina ua faaleo fesili e faasino i mataupu ia. Sosoo ai ma le feiloaiga masani ile taeao ole Aso Sa ile faletalimalo ale ‘au.
Na tau faaofi ai foi ma fesili e faasino ia Kaino faatasi ai ma le ripoti fou lea na faasinosinolima ai le Taitai malaga ale All Blacks, le alii o Darren Shand, ia Michael Cheika faapea o Cheika lava na feagai ma le nanāina ole mea faalogo ile potu fono ale All Blacks ile tausaga ua tea.
Ole mataupu lea, e pei ona ta’ua muamua, faatasi ai ma le mataupu ia Aaron Smith o mea tuai uma mai le tausaga ua tea. Peitai ua toe aliali mai ile taimi tonu lava ole taaloga ile malae ile ANZ Stadium i Homebush.
Na pau le tala fou, ole ripotia lea ole alii o Kaino i lona moliaga ma le tamaitai Ausetalia, peitai e lei gata ai iina tala na maileia ai le All Blacks. Ole po ole Aso Toonai ae malama le Aso Sa, na maua ai ma le tala faanoanoa ua tuumalo le alii All Blacks ta’uta’ua o Sir Colin Meads. Na feagai le Pule Sili ale NZ Rugby, Steve Tew ma le aufaasalalau mo sana faamatalaga ile tautua a Sir Colin ile taaloga i NZ. O lea feiloaiga na fai ile faletalimalo lava ale ‘au, a’o sauni e malaga ese ma Sini.
O nei mea uma na faalafi ai i tua le faia’ina leaga ale Wallabies ile All Blacks 54-34. E matautia le taaloga, matautia ‘ai ale All Blacks, ae na lafi uma i tala faalele faaletonu e faasino ile ‘au – e ui na manumalo le All Blacks, ae pei lava na faia’ina.
