Aliali tuua‘iga o faiga piopio aveesea ai pule o le fanua

E lē itiiti ifo i le 200 eka o fanua o le aiga o Tiariki, o se alii mai le Atu Kuki na maupaolo i se tamaitai Samoa ua toe finau nei fanau a ana fanau ia toe faamaonia o ia eleele o se meatotino a o latou mātua, ae ua aveesea i ni auala solitulafono.

Ua lata i le ono lenei o tausaga talu ona toe taumafai le afioga Fuimaono Mika Tiariki o se great grandson o Tiariki e sailiili pe na faapefea ona aveese le suafa o lo latou tuaa na lesitala ai nei eleele e faapea o loo i se vaega o Matautu agai atu i le Apia Park, ma se vaega o Sogi agai atu i Mulinuu.

O se tasi o suli o le aiga le susuka Mareko Gafatasi Mika Tiariki, na ia faamatala e faapea sa taumafai lo latou tina ua maliu, a o le taimi lea o loo talavou lona soifua (tina) e saili i le ofisa o le Malo sa lesitala ai fanua i le toe fia maua o eleele.

Peitai e oo ane lava ina maliu lo latou tina e lei maua ane pepa ma faamaumauga tonu o eleele ona e faapea sa faafaigata e i latou sa feagai ma ia tulaga le mataupu, aemaise sa iai nisi auala lē manuia sa faia.

O tuua‘iga nei na faaleo ina ua mae‘a le taumafaiga muamua e soalaupule poo se mediation i le va o le aiga ma ofisa o le Malo e pei o le ofisa o loo lestala ai eleele ma le ofisa o tausi mavaega ua lē maua se autasiga i se faaiuga e filemu ai le mataupu. O lea la ua liliu ai nei e finau le mataupu i le faamasinoga maualuga i Mulinuu.

O se uo mamae a le aiga, o se alii Ausetalia o Edmond Parilo lona suafa sa ia faamatala nisi o tuua‘iga e faapea e iai tagata na faia ni gaioiga piopio na mafua ai ona aveesea nisi o eleele ma ua lesitala nei i ni suafa o nisi tagata. O nisi foi eleele ua umia nei e nisi o loo faia pisinisi i le taulaga.
“Ou te ta‘utino atu o le a iai le taimi ma le aso e faailoa ai le mea moni, ona silafia lea e le lalolagi ma Samoa faiga lē manuia o loo faia e ia ofisa o le Malo,” o le faamatalaga lea a le alii o Edmond ina ua malilie le aiga e faailoa lautele le latou mataupu mo le silafia e le atunuu ma le lalolagi.

O le faamatalaga foi a lea alii Ausetalia na ia ta‘ua ai, o loo umia nei e le aiga nisi o faamaumauga ma faafanua o eleele o le a faamaonia ai le latou mau i luma o le faamasinoga.

O nisi o faamaumauga mai taimi o pulega a Siamani o loo manino lava le pulea Tiariki o ia eleele peitai o faamaumauga fou ua latou maua ua iloa ai, le eseesega ua iai ona ua toe suia tagata ua latou umia fanua ina ua liliu i ai le lesitala, ae lē iloa pe na faapefea ona tupu lea faaletonu.
O le soalaupule na faia i le Aso Gafua o le vaiaso ua mavae na ta‘ua e Edmond e lei umi lava se taimi na faia ai, ae mae‘a ona e lei filemu itu na aafia i le soalaupulega i le tau fai aumai o a latou mau.

Fai mai le alii o Edmond na latou molimauina le gatete o sui o ofisa o le Malo ina ua latou faailoa i ai mau o loo latou umia. “O le mea moni e malosi ma o le a aumai lava e le faamasinoga le faaiuga tonu ma sa‘o”, na saunoa ai Edmond.
O se tasi o tina o le aiga (taofia lona suafa) o ia lea o se tasi o loo taulamua i le finauga lenei, ae sa lē mafai ona talanoa mai ona o lana faamatalaga ua uma ona faia le feagaiga ma le latou loia e lē tatau ona ia tautala i le mataupu.

O le vaiaso nei e valaau ai i le faamasinoga le mataupu ma faatulaga ai se aso e fofogaina ai mau a itu o loo aafia i le faamasinoga lenei. E lē o mailoa i ai pe o le a tuu ane muamua se talosaga a le itu a le Malo e faaleaogaina ai le tagi poo se strike out motion.
O sui o le aiga o Gafatasi Mika Tiariki ma se tasi o alii Ausetalia o Edmond Parilo (tulai) o loo finauina le toe aumai o eleele o lo latou aiga ua aveesea i ni faiga piopio a le ofisa o loo lesitala ai eleele ma le ofisa o Tausi Mavaega le Public Trust