Ua filifilia ele Loia sili le alii loia Niu Sila o Paul Dacre QC, nate finauina moliaga ole Komesina o leoleo le afioga Fuiavailili Egon Keil. Peitai ose loia ua masua mai ai i fafo ni atugaluga ua masalomia ai le taavili i tua oni taumafaiga e faasaoina le Komesina mai moliaga ua molia ai ele ofisa o moliaga faasolitulafono le National Prosecution office.
Ole alii loia ua filifilia ele Loia sili sa ia finauina moliaga ose faipule sinia ole Palemene o Niu Sila ua lē o toe avea nei ma faipule le susuga John Banks.
Na molia lea faipule ise moliaga e tasi e fasootai ma lona lē faailoa o ni foai tupe sa fesoasoani atu ai se alii milionea mo lana tapenaga ile faigapalota ua mae‘a a Niu Sila sa toe filifilia ai ni sui faipule ole palemene o lea Malo.
Na tuua‘ia ai le alii loia o Paul Dacre QC, i lona lē tuuina atu ose molimau tāua mo le itu a leoleo na faia moliaga ole faipule o Banks. Na taunuu le faamasinoga apili a Niu Sila na toe iloiloina se talosaga apili ale faipule ile soloia ole moliaga ma lē manuia ai le mau a leoleo sa lagolago ai le moliaga o Banks.
Ua faaalia e se loia sinia ua lē finagalo e faailoa lona suafa, ole mafuaaga lea ose popolega ona e ono aliali mai ile filifiliga ale Loia sili e aumai lea loia e tu mo moliaga ole Komesina o leoleo, e faasao mai ai le Komesina i moliaga. “Ose popolega lena ona e ono iai se tulaga faapena e tupu”.
Ose tasi o atugaluga ua faaleo nei ole lē faailoaina ele faamasino ole faamasinoga maualuga ua seei nate tauave le suesueina o moliaga o le Komesina, o lona sootaga ini tagata e aiga iai le alii Komesina.
“Sa tatau lava ile faamasino ona faailoa ona sootaga (conflict of interest) ona e lē tatau ona ia tauaveina le suesuega o moliaga”. Faaalia ese molimau faatuatuaina, ole faigata ua aliali mai nei e ono lē mafai ele loia ua filifilia ele Loia sili ona tuuina atu se talosaga e faasee ese ma le tauaveina ole faamasinoga o moliaga ole Komesina. Ole fesili pe aisea na faaalia ai ele molimau ole itu tonu lea ua aliali ai ni atugaluga ona ua masalomia e iai ni sootaga vavalalata o le Komesina ma le Loia sili.
E lei mafai ona maua se fesootaiga ile Loia sili e fesiligia ai pe moni pe lē moni foi ia atugaluga, ma ole a tulituliloa ai lenei tulaga mo se finagalo ole afioga Lemalu Herman Retzlaff mo se isi a tatou lomiga ole Samoa Times o lumanai nei.
Ua faailoa ele Loia sili ise pepa o faasalalauga ile faaiuga ole vaiaso ua mavae, ole a toe silasila le loia ua ia filifilia ile faila atoa o moliaga ole Komesina o leoleo ma ole a galulue faatasi foi ma le sui faatonu ole ofisa o moliaga faasolitulafono ose tasi o loia sinia.
Ole aso 11 lea ole a suesue ai le talosaga ale Komesina ma lana loia i Samoa le susuga Komisi Koria ina ia soloia ma faalēaogā moliaga faasolitulafono faasaga ile faauluuluga ole Matagaluega o leoleo.
