O le aso 19 o Oketopa o le tausaga ua mavae i le afiafi na o ai Elisaia, o lona tausoga teine ma le uo tama a lona tausoga, e tafafao i le fale kalapu o le Malisi i Lotopa. O le tusa o le ‘afa o le fitu (7.30pm) i le afiafi o le aso lava lea, na momoli ai Elisaia ma lona tausoga i lo latou fale i Nuu e le uo tama a lona tausoga.
Fai mai tolaulauga a le faamasinoga, na taunuu i le fale ona alu lea o le tamaitai ua matamata lana ata tifaga i lana computer o se laptop i totonu o lona potu. O se taimi o le po o le aso lava lea, na ulufale ai Elisaia i le potu, lea na faaalia i tolaulauga a le faamasinoga na ia taumafai ai e fusi lona tausoga, ae na tuli i fafo e le tamaitai ma fai i ai, o le a vili e ta‘u le alii i ona mātua.
O le po lava lea na tofa ai loa le tamaitai i lona potu ina ua mae‘a ona ia loka mau le faitotoa o le potu sa moe ai.
Na mafaufau pea Elisaia i lea po a o tofa lona tausoga, ma ia maua ai se ki o le faitotoa ma ia tatala ai loa le potu, lea na ta‘ua i tolaulauga a le faamasinoga, sa taunuu i totonu ona ia titina lea o le ua o lona tausoga, ma ia toe avane se ie lavalava ma saisai ai le ua o le tamaitai. O le mafuaaga lea o le maliu ai loa o lona tausoga.
Na ia avane ni nusipepa ma faasalalau solo i totonu o le potu, ina ua mae‘a lea ona ia sulu lea o le auli uila i le palaka o le potu ma ia tutu loa se afi. Na mu le potu seia oo ina aafia ai ma le fale atoa. Poo le ‘afa o le tolu (3.30am) i le vaveao na ia saili ai loa se fesoasoani mai aiga tuaoi.
Sa ia faailoa i aiga tuaoi le mu o le fale ae o loo iai lona tausoga o loo moe i le potu. Pe a fua i le taimi na amata ai le mu ma le taimi na ia saili ai se fesoasoani, na faaalia e le faamasinoga e fai si umi talu ona mu le fale ae faatoa faatino lea tulaga e lē ua molia.
Ina ua taunuu le fuimu ma leoleo sa lē mafai ona toe faia se gaioiga e faasaoina ai le fale ma le ola o le tamaitai le tausoga o Elisaia. O le mae‘a o le faalavelave na faia ai suesuega a se fomai faapitoa i le sailia o le mafuaaga o le maliu, lea na faamautuina ai, na maliu le tamaitai ina ua titina, a o lei mu le fale.
O lea taunuuga na lagolagoina ai le faamatalaga a Elisaia na tuuina atu i leoleo sa ia tautino ai i le gaioiga na ia faia. E tasi le moliaga o le fasioti tagata faamoemoeina ma le moliaga o le susunu fale ma le faamoemoe e faatino ai se solitulafono sa ioeina e lē ua molia, ma o le faasalaga masani pe a ioe se tasi i le fasioti tagata faamoemoeina o le soloatoa i le falepuipui.
E fitu tausaga le faasalaga faafalepuipui mo le moliaga o le susunu fale ma ua tuli faatasi nei faasalaga. O lona uiga e soloatoa ae faatoa mafai ona iloilo se talosaga mo se faamagaloga i le palola mo Elisaia pe a atoa le sefulu tausaga talu ona tuli o lona faasalaga soloatoa.
