Ua lē toe natia le faasasaina e Indonesia o tusitala mai fafo e ripoti sauaga a lana militeri ua loa tausaga o faia i tagatānuu o Papua Sisifo (West Papua) lea ua silia ma le 500,000 ua maliliu ai.

O nei sauaga a fitafita Indonesia e aofia ai le fasiotia o tamā, tina ma fanau ma susunu i lalo fale, nuu ma nai tagata o Papua i Sisifo.

O ni vaaiga sa lē faailoa mai i le lalolagi i le sefulu tausaga talu ai ae peitai o le tomai faaneionapo i fesootaiga telefoni ma upega tafa‘ilagi ua liki mai ai i fafo o Paua Sisifo ata na tanumia i lenei sā a Indonesia ma lana autau militeri o loo faailoa mai ai sauaga matautia ma i latou ua maliliu.

Ua alaga ai nei le toatele i le Pasefika ma i latou o loo aumau i Ausetalia ma Niu Sila e faailoa ma unaia ni faasalaga mo fitafita a Indonesia aemaise la latou faigamalo o loo faatinoina nei sauaga ma faaoo le oti i nai uso a Pasefika.

I totonu lava o Niu Sila ma Ausetalia e lē o vaaia i luga o Televise ma nusipepa faapea leitio ma o se fesili tele pe aisea?

I Sini nei na vaaia foi le savalia o lumāmaota o le Fale o le Palemene i Canberra e nai alo o le Pasefika e aofia ai Samoa i se solo filemu e tetee atu ai ia Indonesia ma ana faiga matautia. Na vaaia i lea solo le aofia ai o nai tamafanau a Ausetalia, Solomona, Vanuatu ma Samoa lea na taulamua ai le tamaitai o Janina Ruta Moaga e luasefululua ona tausaga.

I Perth Ausetalia na faatumulia foi luma o le Amepasa a Indonesia i se tetee toafilemu e faalauiloa ai mafatiaga o nai tagata o Papua i Sisifo.

E toatele nisi iloga mai Niu Sila ua o latou savavali foi mo se taumafaiga ia momoli le mau e faasaoloto Papua Sisifo e aofia ai le tamaitai faiaoga ia Leilani Salesa le tuafafine laiitiiti o le alii Polofesa i le Iunivesite o Aukilani, Afioga Toeolesulusulu Damon Salesa.

I Aferika i Saute le atunuu sa pologa ma sauaina faapenei i le seneturi ua tuanai ma iu ina laveai e le afioga i le Peresetene ta‘uta‘ua ia Nelson Mandela, ua tuuina mai foi lo latou lagolago i le Mau e ‘Free West Papua’ ma o le Matai ia Nikosi Mandela le alo o le alo o Nelson Mandela sa feutagai ma sui mai Papua Sisifo e molimoli mai lo latou lagolago mo se atunuu saoloto i le lumanai.

Tagata maliliu i Papua mai fitafita Indonesia Photo: Free West Papua Campaign

Aoga a Matavai i Sini o loo tetee i sauaga

Janina Ruta Moaga ma nai fanau a le Pasefika i Canberra