O le pasia e le malo tele o Ausetalia o le faaopoopo o le isi $820 i tupe maua a fanau aoga maualuluga i le tausaga, ua talia ma le fiafia e le atunuu.
O le fanau aoga i tulaga lua (Public Schools) ma tagata penisiona o le a maua foi e latou le ta‘i $400 i le tausaga faaletupe lea e amata i le aso muamua o Iuni. O le a maua tonu lenei faamanuiaga i le vaitau faalekalena o le faamanatuina e Samoa o lana Tutoatasi i Sini, ma o se fesoasoani tele lenei aemaise lava i nai o tatou tagata ona o le anoanoai o faalavelave ma faamoemoe o faalapotopotoga, afioaga ma Faafiafiaga o loo moomia ai le seleni e ese mai i pili o vai, eletise, mokesi, saofaga ma tupe lafo i Samoa.
O lenei faasiliga a le malo na faailoa mai aua le fesoasoani e tau siitia le fuainumera o fanau tinou i aoaoga ma faamalosia ai le finau a le tupulaga mo se lumanai manuia.
O le faatupulaia o soligatulafono i tupulaga lautele o Ausetalia ua manatu ai le malo atonu o se fesoasoani tau seleni faapenei o le a toe tapena ai matua aua le faamalosia o Aoga a le fanau.
Ua finau le mau lenei a le malo ma nisi o manatu o le a faaaoga sese foi lenei seleni e latou e mafuli tele i le Masini poka ma le ‘ava malosi faapea fualaau faasaina.
E ui i lea e pau le tulaga ua mautinoa o le a toatele nai aiga o le a fesoasoani malosi i ai lenei tupe $820 aemaise pe afai o se aiga e toalima le fanau aua e maua e i latou le $4,100 Ausetalia e tusa lea ma le $9.925 Samoa.
O se vaaiga i le soifuaga o aso taitasi i Ausetalia nei, ua tele se suiga mai le sefululima tausaga talu ai ona o le tele o galuega i le falefaigaluega gaosi oloa ua tapunia ma auina atu i Saina, Asia ma Initia aua e taugofie mo nei kamupani.
Ua toatele foi galuega ua suitulaga e masini komepiuta tagata faigaluega ma ua le asa le masina ma le vaea o tagata faigaluega. Aepeitai o loo manuia pea i latou o loo tumau galuega.
Ua tuufaatasia nei mau suiga ma le faatupulaia o le tau o le eletise,tului i mokesi ma nonogatupe faapea le tau o penisisi ua fai ma avega mamafa i le toatele. E le gata i lea o le tulai mai o faalavelave i nai aiga i Samoa, Niu Sila ma Ausetalia nei, lea e moomia ai lava le seleni.
