Ole vaiaso lona lua le Aso Toonai na sei mavae atu nei o faagasolo ai le taamilosaga lakapi ale Aukilani Samoa, oloo tausinio ai au a Nuu ma Afioga i Samoa. O lenei taamilosaga e mo le sefulu vaiaso, ma e na o tamafanau lava a Samoa e mafai ona tausinio ai.
Ole vaiaso muamua foi lea ole puipuiga ale Laumua o Tumua ile talita e pei ona o latou se’iina mai ile Apia Maroon ile vaiaso muamua ole taamilosaga.
Ole au malosi mai Nofoalii na o latou lu’iina le talita ile Aso Toonai, peitai e lei mafai ona o latou faafetauia le malosi ole Laumua o Tumua. E mae’a le afa muamua oloo lagi lelei le aso e leai se timu ae oloo 29 le Laumua ile leai a Nofoalii. Ile taimi ole malologa na maligi tele ai timuga ma savili peitai e lei suia ai le faatinoga e le Laumua o Tumua ole taaloga. E mae’a le taaloga ua 39 le Laumua o Tumua ile 7 a Nofoalii.
Ose tulaga maualuga le faatinoga ole taaloga e le Laumua o Tumua e tusa ma le molimau a Alii faiaoga. E talitonu foi sa iai nisi o Sui o lenei au na faamauina i lalo e le Komiti ole Iuni Lakapi mai lea taaloga, e filifili atu mo le faamoemoe ole au taitoafitu a Samoa lea ole a faia e le Faiaoga ale Taitoafitu a Samoa, susuga ia Sir Gordon Tietjens ile Aso Sa nei, Aso Iva o Setema, ile malae ale kolisi i Mt Albert ile 9 ile taeao.
Toatele foi ua lesitalaina o latou igoa mo lenei faamoemoe, peitai oloo silasila pea le Iuni Lakapi ale Aukilani Samoa i tama taaalo oloo maualuga le latou faatinoga i lenei taamilosaga mo so latou avanoa e ofi atu ai ile aua ale atunuu. Ole faaiuga la lenei o taaloga sa faagasolo ile Aso Toonai na sei mavae atu nei.
Manumalo Mountfort Brothers 24 ile 20 ale Laulii liona manumalo le Lamua o Tumua 39 ile puipuiga ole talita mai ia Nofoalii e 7.
Faamo’amo’a e le Auckland Reds ia Iva ile 38 ile 15.
Manumalo le Nations ile la taaloga ma le Apia Maroons 38 ile 20. Ma le taaloga mataina ale Marist Old Boys 41 ai na o latou tata ai ile 15 a Saleimoa. Faiaina le tama ole Lava ile Tama ole Moatoga i ai e 27 ile 12.
Ma le tasi o taaloga finau ile Aso Toonai na sei mavae atu nei ile va o Sataoa ma Faleula, manumalo ai Satao i ai e 10 ile 3 a Faleula. O lenei taamilosaga ale Aukilani Samoa oloo faia lea ile malae a Aorere i Magele i Aso Toonai uma.
I le faaiuga ole vaiaso nei ma le faatulagana o taaloga, ole a fetaui ai le Nations ma le Auckland Reds, Apia Maroon ma Faleula. Saleimoa ma le Tama ole Moatoga. Marist OB ma Moataa, Laulii ma Tama ole Lava. Ae taualuga taaloga ile talita ole a Lui ai e le au malosi mai Iva le Laumua o Tumua.
Oloo unaia malosi pea lenei taamilosaga aua tama fanau a Samoa ina ia siitia le tulaga o latou faatinoga aua so latou lumanai manuia i kalapu maualuluga, e pei ona iai le autele a Aukilani, faapea le au ale Counties Manukau, oloo unaia iai tama fanau a Samoa oloo taaalo ile Aukilani Samoa.
O lea foi ua aapa mai le Iuni Lakapi a Samoa ina ia vaavaa lua ma le Aukilani Samoa e atinae le Lakapi o tama fanau a Samoa i Niu Sila aua le au ale atunuu.
