E lē o mavae galuega lelei a mātua, e ui ina fai i lagi le folauga, ae o loo faaauau pea e fanau le fu‘a o le manumalo poo le fatu lelei sa latou totoina i totonu o le aiga e ala lea i se aiga maopoopo lona faavae ma fealofani. Auā fai mai le Tusi o se aiga ua ia Iesu Keriso o se aiga fiafia ma mautu lona faavae.
O le aiga Sa Lauofo i Aukilani na amata mai ona faavaeina le latou Sulufaga (lotu faamanatu) ua faaigoaina ia Iesu Le Tupu i le tausaga e 1985 e nisi o mātua ua fai i lagi le folauga, ae o loo faaauau pea e nisi o mātua o loo soifua mai i le taimi nei faatasi ai ma fanau lea galuega lelei i totonu o le aiga.
O le Aso Toonai ua mavae 21 o Novema, o se aso timuga ae na tumutumu ai le malumalu o le Ekalesia Katoliko St John Evangelist i Otara i suli o Sa Lauofo o loo alaala i Ausetalia ma Niu Sila nei e patipatia le alofa o le Atua, ina ua atoa le 30 tausaga talu ona faavae mai lenei mafutaga i totonu o Aukilani.
Sa faapea foi ona auai mai ai le Sa‘o o le aiga i Samoa le, le Afioga Lauofo Fonotoe Nuafesili Pierre Lauofo ma lona tausi ia Tuala Sui Lauofo o loo avea ma sui Palemia o le atunuu ma ua maualuga ma matagofie ai le faamoemoe.
O se avanoa lelei ua mafai ona nutimeamanaogi faatasi ai ma toe mafuta ma feiloai ai mātua ma fanau, auā e seāseā maua ni feiloaiga faapenei i aso taitasi. Se mea ina lelei o uso ae nonofo fealofani.
O le afioga ia Patele Ikenasio Vitaliano sa fai ma ositaulaga o le sauniga, ma le taulaga o le Misasa Paia, a o viiga o le Atua na lagiina lava e tamafanau o le aiga Sa Lauofo. Na faapea foi ona mafuta mai ai ma le taitai o le Palisi i Otara le afioga i Patele Brian.
Na mae‘a le sauniga ona agai uma lea i le Greyhound Conference & Function Centre i Manukau auā le taumafataga. Ua militino faatasi tagata matutua ma fanau faapea fanau a fanau i totonu o lea nofoaga e aai ma fiafia faatasi.
O le tofa ia Vaiolo Leatioo sa fai ma fofoga o le aso ma o ia foi sa fai ma sui o le aiga i Aotearoa e tulai i faaaloaloga auā le mamalu o le auvalaaulia faapea susuga i faafeagaiga sa auai O faafiafiaga na tatala e le aufaafiafia mai Ausetalia, ona sosoo ai lea ma le autau a Maria i Otara, faapea nisi o faafiafiaga a le fanau, ae taualuga ai i le sausaunoaga a le Sa‘o o le aiga mai Samoa le Afioga Lauofo ma lona tausi ia Tuala Sui Lauofo.
O le saunoaga autu o le aso na saunoa i ai le Sa‘o o le aiga i lona agaga faafetai ma le faamalo i le komiti o loo latou faafoeina lenei polokalame, aemaise ai o suli ma feoi o le suafa Lauofo o loo aumau i Aotearoa ma Ausetalia ona o le manatu ane, manatu ifo i le faamaopoopoina o le aiga.
Ma soo se tagata lava e iai lona faasinomaga, lona aiga, suafa matai, fanua ma laueleele e mitamita ai o le faasinomaga lea o le tagata. O le taitaifono ia Manuseu Ameto Lauofo na saunoa mulimuli e momoli le agaga faafetai i le paia ma le mamalu o le aiga Sa Lauofo i Aotearoa ma Ausetalia faapea le Sa‘o o le aiga na malaga mai Samoa ma lona tausi e tusa ai ma le manatu i le faamaopoopoina o le aiga, ua tuua lava tiute ma faiva ae ua faatasi mai lava ona o le fai aiga lelei, ma tatala ai loa le filialii.
Ae na saunoa le taitaifono ia Manuseu Ameto, o lenei mafutaga ua leva ona iai ae faatoa faavae le Sulufaga i le tausaga e 1985, ma o le tausaga foi lea na saili ai le aiga i se igoa e tatau ona faaigoa ai lenei lotu faamanatu, ae sa iai se tasi o tamafanau o le aiga sa galue fesoasoani i totonu o le Ekalesisa Katoliko, le susuga ia Pesamino Faata na ia faatuina le igoa o “Iesu Le Tupu” ua alagatatau ona faaigoa ai le Sulufaga auā o Iesu e sulufai ai i mea uma lava, lea ua mafua ai ona faaigoa seia oo mai lava i le taimi nei, ma o le Sulufaga foi lenei e lei misi lava se tausaga ma faataunuu.
