Le saofaiga mamalu a Melepone, afioga i le konesula ma lona faletua (lona 4 ma lona 5 laina i luma), le aufaigaluega paia, Fono faufautua ma Samoa na potopoto

Le saofaiga mamalu a Melepone, afioga i le konesula ma lona faletua (lona 4 ma lona 5 laina i luma), le aufaigaluega paia, Fono faufautua ma Samoa na potopoto

O le The Grand on Princes Reception i le pitonuu o Mulgrave na tatala aloaiaina ai fiafia o le faamanatuina o le 56 tausaga o lo tatou sa’olotoga i le aai o Melepone, pei ona taulamua ai le Fono faufautua mo tagata Samoa i Vitoria i tausaga taitasi mo lenei aso faapitoa o Samoa.

Na faia ai la latou po fiafia Independence Ball, na faatumulia i le paia lasilasi o le atunuu i ona tupu ma tamalii seia oo lava i fanau talavou, faauluuluga o faalapotopotoga ma kamupani, sui mamalu o le malo faasetete o Vitoria, tainanae le afioga i le konesula o Samoa i Ausetalia le afioga a Fonoti Etuale ma lona faletua na fai ma sui faaaloalogia o le malo o Samoa.

Pei lava o tu ma aga masani na amata lava foi i le faigalotu na sulaina ai le viiga o le Atua, ona  saunoa faafeiloai lea o le afioga i le sui taitaifono afioga ia Lemalu Tevaseu, sosoo ai ma le saunoaga a le afioga i le konesula faapea le sui ole malo faa setete  ma faagasolo ai loa faiva o le fofoga o le po le susuga ia Isaia Aiono, na amataina faafiafiaga matagofie e le Tausala Samoa sosoo ma le Tama Matu, le alii pese o Tee Toleafoa, aemaise le sao matagofie o le susuga ia Richard Parker, tainane le faaili malosi a le Pacific Beatz na fofogaina musika autu na saasaa ai le atunuu ma le valaaulia.

Na felanulanuai le taumafataga a’o faagasolo fiafia, na faafeiloai ai foi tamaitai lalelei o le a tauva mo le miss Victoria i so latou sao ma la latou saasaaga faa Samoa ae le faagaloina foi le alofa tulai o le atunuu i saasaaga faa Samoa na mati’e ai le faamoemoe i lea po. O le taeao na sosoo ai le Aso Toonai na toe ofaga potopoto ai le atunuu mo le faamanatuina o lana Fu’a, pei foi ona amataina i le sauniga lotu na taitaia e le uarota a Hampton Park ma Rivercum a le ekalesia a Iesu Keriso o le Au Paia o Aso e Gata ai, o susu ia Epikopo Fotualii Aumua ma Epikopo Afereti  Iuli na taitaia le sauniga ma laugaina le afioga paia a le Atua faatasi ma o la fesoasoani tainane le galuega fita a le aufaipese lea foi na fofogaina vii o malo e lua.

Na mae’a le sauniga sosoo ma le saunoaga a le afioga a le taitaifono le fetalai ia Fuga Alofipo Ale ma faafeiloai i le mamalu ua potopoto, ona saunoa ai lea o le konesula ma sui o le malo o Vitoria ma faagasolo ai le polokalame a le fofoga o le aso le fetalaiga ile tulafalealii le tofa ia Fiu Seti Aloiai i faafiafiaga eseese aemaise o le taumafataga, o le tootoo o Leulumoega le afioga ia Lealaitagomoa Heka na saunoa e fai ma sui o le ekalesia, ae talifuaitau le afioga ia Afamasaga Mauga ma faatino foi faaaloalo masani mo le konesula ma le aufaigaluega paia ma Samoa na potopoto.

Na faai’u le polokalame ile lagiina o le pese lota nuu ma faafetaia le agalelei o le Atua o Samoa.  Ona tatala ai lea o le filialii ina ua lululima lea ma faatofa.