Agasala & Faaolataga! Faaolataga mai tuinanau o le tine

E faafeiloai ma faatalofa atu ai i le mamalu o si ou atunuu pele Samoa.  Faatalofa faapitoa atu foi i paaga a le Taiala i vaiaso taitasi. Poo fea lava o loo maua mai ai nei tusitusiga e ala i lomiga o vaiaso taitasi, e faatalofa atu i le suafa manumalo o Iesu Keriso. O le suafa lea ua mafai ai ona tuufaatasia i tatou, ua le afaina ai poo fea e te alaala ai, poo fea foi le atunuu na e fanau ai, poo le a foi le ituaiga aiga na e soifua mai ai, o le manatu e le afaina ia itu uma, aua ua tasi i tatou ia Keriso Iesu.

E viia pea le Atua e ona le mana o lana lava Upu ua mafai ai ona tatou salamo ma liliu ese mai le agasala ae liliu atu i le Atua. Ou te manatu ua tele ni vaega aoga ma le taua na aveatu i vaiaso talu ai, aua le tapueina ma le aoaoina pea o i tatou e ala i le ola fou ma le taliaina o le meaalofa foai fua a le Atua mo i tatou lana fanau agasala.

Aua lava nei galo ia te i tatou le sini autu o nei aoaoga, ina ia mafai ona malamalama i tatou uma i le leaga ma le matautia o le agasala, faatasi ai ma le galuega alofa na saunia e le Atua e ala ia Keriso Iesu ina ia mafai ona faasaoina ma laveaiina ai o tatou tagata agasala mai le mea sa nofo pologa ai.

I le mataupu ua mavae atu, sa tatou iloa mai ai, o le fanaufouina e aofia ai le faasaolotoina atoatoa o i tatou mai le agasala ma ona aafiaga. Ua faamamaina i tatou e ala i le toto o Iesu Keriso. Ua tatou taliaina le ola fou mai le Atua, faatasi ai ma natura paia o le Atua. A o tuputupu ae lo tatou ola faaleagaga, ua molimauina foi le taumafai malosi o tuinanau o le tino ma mafaufauga leaga o le tagata, ina ia faasaga taua atu i le agaga o le Atua o loo matua galue i totonu ia i tatou.

Soo se tagata ua faaolaina e tatau ona soifua i se soifuaga manumalo ma e tatau i lea tagata ona ia malamalama i mea ua ia maua mai i le Atua ina ua fanaufouina. E tatau foi ona tatou malamalama i ala ua saunia e le Atua e foia ai ma faasagatau atu ai i o tatou tuinanauga faaletino poo le tagata tuai. E ao ina tatou iloa, o nei feteenaiga, ua avea ma taua e tupu pea i totonu o o tatou loto i aso uma ma taimi uma.

O LE TAUA

E le o utuva le faalogologo atu i tala aave mai i nusipepa ma televise faasalalau i le vevesi o loo tulai mai i le va o Isaraelu ma Palesitina. O nei vevesi e mafua mai i le mataupu lea o loo finauina ai e Palesitina le faatuina o sona setete i totonu o eleele o Isaraelu. O le maaleale tele o lenei mataupu, ua faigata ai ona maua se filemu i nei malo ma ua faatupulaia ai pea le fetauai e pei ona vaaia i nei aso.

Peitai e le faatusalia le taua i le va o Isaraelu ma Palesitina i le taua o loo faia nei i le va lea o le tino ma le agaga poo le tagata tuai ma le tagata fou. O lenei taua e le mafai ona vaaia e mata, e le mafai foi ona faaaogaina i ai ni mea tau faaniukilia poo ni laau malosi, peitai o loo faia pea lea taua i taimi uma. O lenei taua, o loo tetee atu ai le agaga i galuega a le tino faapea foi ona tetee atu le tino i le agaga. Silasila i le Tusi a Roma mataupu e fitu mo se malamalamaga atoa.

O lenei taua, e mafua mai ina ua taumafai le ‘tagata tuai’ e pulea i tatou e aunoa ma le Atua, ma le taitaiga a le Agaga Paia o loo nofo i totonu o i tatou. E tatau foi ona malamalama e iai le eseesega o le tino ma le loto. O le loto e aofia ai le mafaufau, lagona, ma le loto fuatiaifo ua lelei. O le loto e tatau ona tuuina atu e fai ai le finagalo o le Agaga Paia ae aua le faaumatiaina. O le malosi o le tino ua uma ona faaumatiaina i le maliu ma le Toetu manumalo o Iesu Keriso.

O A UIGA POO NATURA O LE TINO?

O le fanau i la le tino o le TINO lea. E le mafai ona faaleleia pe suia lea tulaga e ala i le aoaoina, toaga i le lotu poo nisi lava mea. E le mafai foi i le malosi faaletagata ona suia lea tulaga.

O e i la le tino, e LOTO ATU i MEA A TINO. O le loto i mea a le tino o le ITA lea i le Atua. O lona uiga o i latou ia e le fiafia e faitau, faalogologo ma taliaina le Afioga a le Atua.

O le loto i la le tino o le OTI lea. E mafua lea tulaga ona ua leai se malosi faaleagaga e tetee atu ai i le malosi o le tino.

E MAFAI ONA FAASAOLOTO I TATOU MAI LE MALOSI O LE TINO

O le toto o Iesu Keriso ua fufulueseina ai a tatou agasala. Ua mafai foi ona fufulu ese ai le tagata tuai poo le tulafono o le agasala o loo galue i totonu o o tatou tino. E manaomia le mana o le satauro e faaumatia ai le tagata tuai poo le malosi o le agasala.

Roma 6:3 “Tou te le iloa ea o i tatou uma o e ua papatisoina ia Iesu ua papatiso i tatou i lona maliu”

Roma 6:4 “Ua tatanu faatasi i tatou ma Iesu Keriso i lona maliu”

Roma 6:8 “O lenei afai ua oti i tatou ia Iesu Keriso ua tatou talitonu tatou te ola faatasi ma Ia.”

O le maliu o Iesu Keriso, ua faamagaloina ai i tatou mai le agasala. Ua faapea foi ona Ia faaumatia ai le malosi o le tulafono o le agasala o loo galue i totonu o tatou tagata. O i tatou na oti uma ia Atamu ona o le agasala, a o lea ua faasaoina i tatou ona o le toto e ala i le maliu o Iesu.

TALIA LE AUALA NA SAUNIA E LE ATUA

I le tusi o Roma mataupu e ono, o loo faailoa mai ai le faavae ma sitepu mo le faasaolotoina o le Kerisiano mai le malosi o le tino:

Ia ILOA ma talia le Upu Moni, e pei ona molimau mai ai le Agaga Paia ia te oe. “Ua tatou iloa lenei mea, na faasatauroina faatasi ma ia lo tatou tagata tuai, ina ia faumatia ai le tino o le agasala, ina ia le toe faapologaina i tatou i le agasala.”  (Roma 6:6) “Ua tatou ILOA ua toetu mai Keriso nai e ua oti, e le toe maliu lava o ia, e le toe pule le oti ia te ia.” (Roma 6:9)

Ua e talia le Afioga a le Atua ma ua tatau foi ona avea ma au tautinoga tumau i lou lava soifua. “Afai foi ua oti faatasi i tatou ma Keriso, ua tatou TAOFI, tatou te ola foi faatasi ma ia.” (Roma 6:11)

O le TUUINA atu. “Aua foi nei tuuina atu o outou tino i le agasala e fai ma auupega a le amio leaga; a ia outou tuuina outou i le Atua, e pei o e ua ola nai e ua oti, ma ia tuuina atu outou tino i le Atua e fai ma auupega a le amiotonu.” (Roma 6:13)

O le faamoemoe maualuga o le fili poo le alii o lenei lalolagi, o le taumafai lea ina ia toe faafoi i tatou i le soifuaga toilalo ma le faiaina sa tatou iai. O le natura faaletagata lava ia o le fiafia i mea o le tino nei, ae o le mea lea na maliu ai Iesu, ina ia suia mai i tatou mai le faaletino ae liliu atu i le faaleagaga. Ua aoao mai le Tusi Paia e faapea, o le tuinanau o le tino, o le tuinanau o mata, o le faalialia vale o lenei olaga, e le mai le Tama ia, ae mai le lalolagi. O galuega ia a le tino o loo tau pea i aso uma ma le agaga o le Atua o loo matua galue i totonu ia i tatou. O le tala fiafia mo oe Samoa, o le mea lea na maliu puapuaga ai Iesu ina ia faaumatia galuega a le tino. Ua manumalo o ia i le oti ma le tuugamau, ua toe tu mai, o lo tatou manumalo foi lena, mai tuinanauga o lenei olaga e ala i galuega a le tino. E ui lava ina o tatou ola ma soifua i le tino nei, ae o i tatou o tagata manumalo e ala i le maliu o Iesu Keriso.

Avea ia le manumalo o Iesu e avea ma ou malosiaga i lenei vaiaso, a o tatou tau ai le taua i aso uma. Manatua, e sili le malosi o le o loo i totonu ia i tatou, nai lo le o loo i le lalolagi.

Ia manuia tele lenei vaiaso