Ole mitamitaga ole Samoa, o lana aganuu ma le tu faaaloalo. Ose galala lava sa naumati ile fia tofo lea ua pei ose mitamitaga ile toatele o tupulaga talavou i totonu ole polokalame ole “Aganuu Samoa 101” ua lauiloa i Niu Sila ma Ausetalia, ole faa‘oaina ile gagana sa a‘oa‘oina.
O nei vasega na faatoa tasi le tausaga talu ona tatala i Aukilani ae ole tausaga nei na faavae ai vasega i totonu o Brisbane. Ua maoa‘e le matautia ole tupu ma le ola ile molimauina ole lolofi atu o tupulaga talavou, alo ma fanau na soifua ma ola a‘e i Ausetalia ma Niu Sila.
Ose naunautaiga ma se manaoga tupito o i latou nei, ia mafai ona latou malamlama atili ile aganuu faa-Samoa e ala lea ile a‘oa‘oina o paia o Samoa, sulatoga, solo‘ava, folafola meaai, ma le aganuu lata mai ae sili ai le mafai ona o latou tautatala ai.
O lea sa molimauina ile po ole Aso Toonai ua tuanai, aso lima o Novema le toatele o i latou na faailoa lo latou agaga fiafia ma le faagaeetia i nei avanoa faaauro ua latou maua, auā na ta‘ua e nisi, pei lava o gūgū e matamata i ata tifaga na o taga ae lē lagona ni leo auā e na‘o le faalogo lava ae aunoa ma se manino poo ā uiga o tala loloto ole gagana Samoa oloo talanoaina i meafai ale atunuu ma aiga pe a auai atu iai. Na faaaila lo latou fiafia tele mai le ta‘ele o latou loto ma agaga, e to o latou pulou ma mitamita ona ole tulai mai o nisi o toa ma faatulai lenei galuega fita mo latou, le tofa ia Apulu Tuuu Mary Kalala Autagavaia ma Tanoa‘i Reupena Michael Tanoa‘i ua faa‘oaina i laua e a‘oa‘oina le gagana Samoa i nei tupulaga lalovaoa ale atunuu.
Ole polokalame ua gasolo atu iai le toatele o tupulaga, ose feau tāua lea oloo tala‘i atu pea i nisi ma faapea ona ofi atu auā ua galala ma naumati ile alualu i luma ole tautatala ile gagana Samoa aemaise lava meafai e pei o faaipoipoga, maliu, saofai ma nisi meafai a Samoa.
Na matuai faatumulia le hall a leoleo ile aai o Logan City ile po anapo i aiga ma uo na molimauina taumafaiga ale vasega 3 e lata ile 50 tagata ae ole aoga atoa e lata ile 200 tamaiti aoga.
Na mae‘a le lagiina ole vii ole fu‘a ona taitaia lea ele susuga ia Rev Makisua Reupena (faafeagaiga EFKS Centenary) ise tatalo ma faagasolo ai loa taitoatasi tamaiti e faatino a latou vaega na a‘oina.
Na taufaiofo le toatele o mātua ma aiga ile silafia ua ausia e nei tupulaga na fananau ane i atunuu i fafo, e lē gata i lea ole isi laasaga ua faafiafiaina ai i latou ole fia laeiina lea ole tatau ma le malu a Samoa auā fai mai toeaiina e ta muamua le gutu se‘i tulou ta ai loa le tatau.
Ua galulue vaavaalua nei ma le susuga ia Su‘a ole agaiotupu, ma ole vaiaso fou ole a samaina ai tatau a nisi tamaiti ole aoga.
O po ole Aso Toonai ile feagai ai ma le Fiafia Night ale vasega tolu, na filifili ai isi tupulaga e ulufale atu ile workshop sa faia ile afiafi ole Aso Sa ma resitala ai o latou suafa auā e manatu i latou afai e mafaia foi e la tamaiti, aisea ole a latou pogisa ai pea ile fia iloa ole gagana Samoa oloo latou a‘oa‘oina?
Mo i latou e lē o silafia, ole polokalame oloo a‘oa‘oina ile gagana Samoa ma le faaperetania, ae ose faatalanoaga ma le tofa ia Tuuu Mary Kalala Autagavaia i lea afiafi, ole faiaoga, na mautinoa ai le agavaa ma le faa‘oaina o lenei foi faletua e ala ile taleni ua tuuina iai ele Atua.
E tupuga mai ise aiga e tamaoaiga ile aganuu e pei ona iai se tasi o toa ta‘uta‘ua o lona aiga, Tofaeono Tanuvasa Tavale (uncle) pe a maitau atu ose tagata foi sa a‘oa‘oina alo ma fanau ile Kolisi o Samoa ile mataupu ole gagana Samoa mo tausaga ua tuanai ma le tele o isi ona tomai. Ua alagatatau lenei tofiga ua ia faasoa ma fafaga ai alo ma fanau a Samoa i Ausetalia ma Niu Sila faapea lona soatau ia Tanoa‘i Reupena Michael Tanoa‘i lea sa lei mafai ona auai ile po ole Aso Toonai ua taunai ona o nisi o tuatuagia.
